ஒரு தனிநபரின் அதிகார தாகத்திற்காக நாடு அவசரநிலைக்குள் தள்ளப்பட்டதாக பாஜக தேசிய பொதுக்குழு உறுப்பினர் அண்ணாமலை தெரிவித்துள்ளார்.
அவர் விடுத்துள்ள பதிவில், நமது நாட்டு மக்கள் மீது ஜனநாயகத்தின் சிறகுகளை அறுத்து எறியும் நோக்கில், கொடூரமான அவசரநிலை அமல்படுத்தப்பட்டு 50 ஆண்டுகள் நிறைவடைகிறது. சுதந்திரத்திற்குப் பிந்தைய நமது நாட்டின் வரலாற்றில் இது ஒரு இருண்ட அத்தியாயமாகவே உள்ளதாக தெரிவித்துள்ளார்.
மேலும் 50 ஆண்டுகளுக்கு முன்பு ஒரு தனிநபரின் அவசரநிலை மற்றும் அதிகார தாகத்திற்காக நாடு அவசரநிலைக்குள் தள்ளப்பட்டது என்பதை எண்ணிப்பார்க்க வேண்டும் என்றும் அவர் கூறியுள்ளார்.
எண்ணற்ற மக்களின் தியாகங்களையும், நமது நாட்டு மக்களின் சிவில் சுதந்திரம் மற்றும் அரசியலமைப்பு உரிமைகளை மீட்டெடுக்க நமது தலைவர்களின் தொடர்ச்சியான போராட்டத்தையும் நினைவு கூர்வோம்.
இந்த நாளில், நமது அரசியலமைப்பைப் பாதுகாப்பதற்கும், ஜனநாயக விழுமியங்களை நிலைநிறுத்துவதற்கும், நமது நாட்டின் குரல் மீண்டும் ஒருபோதும் சர்வாதிகார லட்சியத்தால் மௌனமாகாமல் இருப்பதை உறுதி செய்வதற்கும் நம்மை மீண்டும் அர்ப்பணித்துக் கொள்வோம் என அண்ணாமலை தெரிவித்துள்ளார்.
