தேசிய ஜனநாயக கூட்டணியின் எம்பிக்கள் கூட்டத்தில் புதிய பாஜக தலைவர் நிதின் நபினுக்கு பிரதமர் மோடி மாலை அணிவித்து வாழ்த்து தெரிவித்தார்.
பட்ஜெட் கூட்டத்தொடர் தொடங்கி நடைபெற்று வரும் நிலையில், நாடாளுமன்ற வளாகத்தில் பிரதமர் மோடி மற்றும் பாஜக தேசிய தலைவர் நிதின் நபின் தலைமையில் தேசிய ஜனநாயக கூட்டணியின் எம்பிக்கள் கூட்டம் நடைபெற்றது. இந்தக் கூட்டத்தில் கலந்து கொள்வதற்காக முதல்முறையாக வருகை தந்த பாஜக தேசிய தலைவர் நிதின் நபினுக்கு உற்சாக வரவேற்பு அளிக்கப்பட்டது. பிரதமர் மோடி மற்றும் தேசிய ஜனநாயக கூட்டணி கட்சியின் நாடாளுமன்ற குழு தலைவர்கள் மாலை அணிவித்து வரவேற்பு அளித்தனர். இதனை தொடர்ந்து, இந்தியா-ஐரோப்பிய யூனியன் இடையேயான தடையற்ற வர்த்தக ஒப்பந்தம், இந்திய பொருள்கள் மீதான இறக்குமதி வரியை அமெரிக்கா குறைத்தது ஆகியவற்றை சுட்டிக்காட்டி பிரதமர் மோடிக்கு தேசிய ஜனநாயக கூட்டணியின் எம்பிக்கள் வாழ்த்துக்கள் தெரிவித்தனர். இந்த கூட்டத்தில், பட்ஜெட் கூட்டத்தொடரில் எழுப்ப வேண்டிய முக்கிய விவகாரங்கள், எதிர்க்கட்சிகளின் கேள்விகளுக்கு அளிக்க வேண்டிய பதில்கள், டோக்லாம் விவகாரம் உள்ளிட்டவை குறித்து ஆலோசிக்கப்பட்டது.
