ஏற்காடு தொகுதியில் கூப்பன் வழங்கும் திமுகவினர் – என்ன செய்கிறது தேர்தல் ஆணையம்!

ஏற்காடு சட்டமன்ற தொகுதியில் திமுகவினர் கூப்பன் வழங்கும் வீடியோ இணையத்தில் வெளியாகி வைரலாகி வருகிறது.

திமுக தேர்தல் அறிக்கையில் பெண்களை கவரும் வகையில் 8 ஆயிரம் ரூபாய் மதிப்பிலான கூப்பன் வழங்கப்படும் என தெரிவிக்கப்பட்டுள்ள நிலையில், இந்தத் திட்டத்தை மையப்படுத்தி திமுகவினர் பிரச்சாரம் மேற்கொண்டு வருகின்றனர்.

தேர்தலில் வெற்றி பெற்ற பின் வழங்கப்பட வேண்டிய கூப்பன் மாதிரிகளை தற்போது அச்சிட்டு திமுகவினர் வழங்கி வருகின்றனர். அந்த வகையில், சேலம் மாவட்டம், ஏற்காடு தொகுதிக்குட்பட்ட வாழப்பாடி, சேசஞ்சாவடி, அயோத்தியாபட்டினம், காரிப்பட்டி ஆகிய பகுதிகளில் உள்ள வீடுகளுக்கு சென்று திமுகவினர் 8 ஆயிரம் ரூபாய் மதிப்பிலான கூப்பன்களை வழங்கி பெண்களிடம் வாக்கு சேகரித்து வருகின்றனர்.

இந்த வீடியோ சமூக வலைதளங்களில் வெளியாகி வைரலாகி வரும் நிலையில், தேர்தல் பறக்கும் படையினரிடம் புகார் அளித்தும் நடவடிக்கை எடுக்கவில்லை என எதிர்க்கட்சிகள் குற்றச்சாட்டியுள்ளன.