தவெக தலைவர் விஜய்க்கு அண்ணாமலை வாழ்த்து – தமிழக மக்களின் தீர்ப்புக்கு தலைவணங்குவதாகவும் பதிவு!

தவெக தலைவர் விஜய்க்கு  பாஜக தேசிய பொதுக்குழு உறுப்பினர் அண்ணாமலை வாழ்த்து தெரிவித்துள்ளார்.

அவர் விடுத்துள்ள பதிவில், தமிழக மக்களே, உங்கள் தீர்ப்பிற்காக நான் தலைவணங்குகிறேன். என் மண்ணில் உள்ள மக்கள் ஒரே குரலில்  தங்கள் தீர்ப்பின் மூலம் முழக்கமிட்டதைக் காண்பதில் நான் மிகுந்த மகிழ்ச்சியடைகிறேன் என தெரிவித்துள்ளார்.

வாக்குகளை விலைக்கு வாங்குவதற்கு ‘இல்லை’ (NO)
2. வாரிசு அரசியலுக்கு ‘இல்லை’ (NO)
& அரசியலில் ஒரு தலைமுறை மாற்றத்திற்கு ‘ஆம்’ (YES).

இம்மாற்றத்தை யார் சாத்தியப்படுத்தினாலும், அவர்கள் உண்மையில் அனைவருக்கும் ஒரு பெரும் நன்மையையே செய்திருக்கிறார்கள் என்றும் அவர் கூறியுள்ளார்.

தமிழக அரசியலில் ஒரு பிரம்மாண்டமான அறிமுகத்தைச் செய்திருக்கும் TVK மற்றும்  விஜய் அவர்களுக்கும் எனது வாழ்த்துகளையும் நல்வாக்குகளையும் தெரிவித்துக்கொள்கிறேன் என்றும் அவர் குறப்பிட்டுள்ளார்.

நீங்கள் முன்னெடுத்துச் செல்லத் திட்டமிட்டுள்ள நற்பணிகளைச் செவ்வனே நிறைவேற்ற, எல்லாம் வல்ல இறைவன் உங்களுக்குத் துணையாக நிற்கட்டும் என்றும் அவர் கூறியுள்ளார்.

மேலும், அனைத்து NDA வேட்பாளர்களுக்கும்… களத்தில் இது ஒரு மிகக் கடுமையான போராட்டமாக அமைந்திருந்தது. வெற்றி பெற்ற அனைவருக்கும் வாழ்த்துகள் என்றும் அவர் குறிப்பிட்டுள்ளார்.

இம்முறை வெற்றியைப் பதிவு செய்ய இயலாதவர்கள், நாம் தொடர்ந்து போராடுவோம்!
இத்தேர்தலில் ஏற்பட்ட தோல்விக்காக, மு.க. ஸ்டாலின் , திரு. சீமான் அவர்களுக்கும்  ஆழ்ந்த வருத்தங்களைத் தெரிவித்துக்கொள்கிறேன் என்றும் அவர் கூறியுள்ளார்.

இறுதியாகவும், மிக முக்கியமாகவும்… களத்தில் அயராது உழைத்த  அன்பிற்குரிய பாஜக தமிழகத் தொண்டர்களுக்கும், தலைவர்களுக்கும்  மனமார்ந்த நன்றியைத் தெரிவித்துக்கொள்கிறேன் என்றும், இன்னும் சிறந்த காலங்கள் விரைவில் மலரும் என்றும் குறிப்பிட்டுள்ளார்.