மொபைல் டவர்கள் இல்லாத இடங்களில் மக்கள் தொடர்பில் இருக்க உதவும் வகையில், இந்தியாவில் BSNL நிறுவனம் 1.34 லட்சம் ரூபாய் மதிப்பிலான புதிய சாட்டிலைட் போனை அறிமுகப் படுத்தியுள்ளது.நெட்வொர்க் இணைப்பு இல்லாத பகுதிகளில் பயன்படுத்துவதற்கு வசதியாக இந்த சாட்டிலைட் போன் வடிவமைக்கப்பட்டுள்ளது. BSNL சாட்டிலைட் போனை யாரெல்லாம் பயன்படுத்தலாம்? இந்த போனை எப்படி வாங்கலாம் ? என்பது பற்றிய ஒரு செய்தி தொகுப்பு.
அவசர காலங்களில் வழக்கமான தொலைத்தொடர்பு இல்லாத நெட்வொர்க் கிடைக்காத காடு மற்றும் மலைப்பகுதிகளில் பயனுள்ளதாக அமையும் வகையில் மத்திய அரசின் பொதுத் துறை நிறுவனமான BSNL சாட்டிலைட் போனை அறிமுகப் படுத்தியுள்ளது.
வழக்கமான நெட்வொர்க்குகளுக்குப் பதிலாக செயற்கைக்கோள்களைப் பயன்படுத்திச் செயல்படும் வகையில் Inmarsat நிறுவனத்துடன் இணைந்து BSNL இந்தப் போனை தயாரித்துள்ளது.
ஐபோன் மற்றும் பிற ஸ்மார்ட் போன்களை விட பல சிறப்பம்சங்களுடன் சார்ஜ் செய்யும் வசதிகள் இல்லாத இடங்களில் நீண்ட நேரம் பயன்படுத்தினாலும் நீடித்த பேட்டரி ஆயுளுடன் சவாலான சூழல்களுக்காக விரைவில் பழுதாகத வகையில் உறுதியான வடிவமைப்புடன் இந்த சாட்டிலைட் போன் உருவாக்கப்பட்டுள்ளது.
வாய்ஸ் கால் வசதி மூலம் டவர் இல்லாத இடத்தில் இருந்து கூட தெளிவாக பேச முடியும் வகையில் தயாரிக்கப் பட்டுள்ள இந்த சாட்டிலைட் போன் பேரிடர் காலங்களில் எஸ்ஓஎஸ் எமர்ஜென்சி சப்போர்ட்டை வழங்கும் என்றும் கூறப்பட்டுள்ளது.
முக்கியமாக பாதுகாப்புத் துறை, கடல்சார் நடவடிக்கைகள், பேரிடர் மீட்புப் பணிகள், சுரங்கத் தொழில் ஆகியவற்றில் பணியாற்றுவோர், டவர் இல்லாத பகுதிகள் வழியாக ஆன்மீக பயணம் செல்பவர்கள் மற்றும் சாகசப் பயணம் செல்பவர்கள் ஆகியோருக்கு இந்த சாட்டிலைட் போன் பயனுள்ளதாக இருக்கும் என்றும் தெரிவிக்கப் பட்டுள்ளது.
ஒரு ஐபோன் 17 ப்ரோ விலைக்கு நிகராக BSNL சாட்டிலைட் போனின் விலை 1 லட்சத்து 34 ஆயிரத்து 166 ஆக நிர்ணயம் செய்யப் பட்டுள்ளது.
இந்தியாவில், சாட்டிலைட் போன்களுக்குக் கடுமையாகக் கட்டுப்பாடுகள் உள்ளதால் பொதுமக்கள் இந்த சாட்டிலைட் போனை எளிதாக வாங்கி விட முடியாது.
மிக முக்கியமான மற்றும் அவசரத் தேவைகள் கொண்ட பணிகளுக்காக (mission-critical situations) வடிவமைக்கப்பட்ட ஒரு சிறப்புத் தகவல் தொடர்பு சாதனமாக உள்ள இந்த BSNL சாட்டிலைட் போனை வாங்குவதற்கும் பயன்படுத்துவதற்கும் தொலைத்தொடர்புத் துறையிடமிருந்து முதலில் அனுமதியைப் பெறவேண்டும்.
நாடு முழுவதும் தனது தரைவழித் தொலைத்தொடர் terrestrial நெட்வொர்க்கை BSNL தொடர்ந்து விரிவுபடுத்தி வரும் நிலையில் இந்த சாட்டிலைட் போன் அறிமுகமும் மேற்கொள்ளப்பட்டுள்ளது.
முன்னதாக நாடு தழுவிய அளவில் தனது சேவையை விரிவுபடுத்தும் நடவடிக்கையின் ஒரு பகுதியாக, கிட்டத்தட்ட 99,000, 4G தளங்களை செயல்பாட்டிற்குக் கொண்டு வந்துள்ளதாக BSNL நிறுவனம் அறிவித்துள்ளது.
தொடர்ந்து நாடு முழுவதும் கூடுதல் 4G தளங்களை அமைக்கவும் BSNL-க்கு அனுமதி அளிப்பது குறித்தும் மத்திய அரசு பரிசீலித்து வருவதாக கூறப் படுகிறது.
