சென்னை வேளச்சேரியில் ப்ரோமோஷன் நிகழ்வை முன்னிட்டு ஏற்பட்ட போக்குவரத்து பாதிப்புக்கு நடிகர் ஹிப் ஹாப் ஆதி வருத்தம் தெரிவித்து வீடியோ வெளியிட்டுள்ளார்.
சென்னை வேளச்சேரியில் உள்ள பீனிக்ஸ் வணிக வளாகத்தில் இசையமைப்பாளரும், நடிகருமான ஹிப்ஹாப் ஆதி நடித்த ‘மீசைய முறுக்கு’ படத்தின் இரண்டாம் பாகத்தின் ப்ரோமோஷன் நிகழ்ச்சி நடைபெறுவதாக சமூக வலைதளத்தில் அறிவிக்கப்பட்டது. இதனை அடுத்து அவரை காண்பதற்காக 10 ஆயிரத்திற்கும் மேற்பட்ட இளைஞர்கள் வணிக வளாகத்தில் குவிந்ததால் அந்த பகுதியில் கடும் போக்குவரத்து பாதிப்பு ஏற்பட்டது.
வேளச்சேரியில் இருந்து கிண்டி வரை சுமார் 5 கிலோ மீட்டர் நீளத்திற்கு 3 மணி நேரத்திற்கும் மேலாக போக்குவரத்து நெரிசல் ஏற்பட்டது. இந்நிலையில், பாதுகாப்பு காரணங்களால் நிகழ்ச்சி ரத்து செய்யப்பட்டுள்ளதாக ஹிப்ஹாப் ஆதி வீடியோ வெளியிட்டுள்ளார்.
அவர் வெளியிட்டுள்ள வீடியோவில், காவல்துறைக்கு மதிப்பளித்து நிகழ்ச்சியை ரத்து செய்துள்ளதாக கூறியுள்ளார். மேலும், நிலைமையை புரிந்துகொண்ட ரசிகர்களுக்கு நன்றி என்றும், மீண்டும் சந்திக்கலாம் எனவும் வீடியோ வெளியிட்டு விளக்கம் அளித்துள்ளார்.
