தேர்தல் ஆணையத்திற்குள் கருத்து வேறுபாடா ?; திட்டவட்டமாக மறுப்பு

எஸ்.ஐ.ஆர். எனப்படும் வாக்காளர் பட்டியல் சிறப்பு தீவிர திருத்தம் தொடர்பாக தேர்தல் ஆணையத்திற்குள் கருத்து வேறுபாடு ஏற்பட்டதாக வெளியான தகவல்களுக்கு தேர்தல் ஆணையம் மறுப்பு தெரிவித்துள்ளது

இது தொடர்பாக தேர்தல் ஆணையம் வெளியிட்டுள்ள தகவலில், எஸ்.ஐ.ஆர். தொடர்பான அனைத்து முடிவுகளும் ஒருமனதாகவே எடுக்கப்பட்டதாக தெரிவிக்கப்பட்டுள்ளது.

வாக்காளர் பட்டியலில் இருந்து பெயர்களை நீக்குவது மற்றும் வாக்காளர் தரவுகளை கையாளுவது தொடர்பாக தேர்தல் ஆணையர்கள் சுக்பீர் சிங் சந்து மற்றும் விவேக் ஜோஷி ஆகியோர் சில கவலைகளை தெரிவித்ததாகவும்,

ஆனால், அவை இறுதி முடிவுகளுக்கு எதிரான கருத்து வேறுபாடுகளாக அமையவில்லை எனவும் கூறப்பட்டுள்ளது.

எஸ்.ஐ.ஆர். நடவடிக்கையில் கடந்த 10 மாதங்களில் 14 முறை இரு தேர்தல் ஆணையர்களும் ஆட்சேபனை தெரிவித்ததாக அரசியல் கட்சிகள் தொடர்ந்து விமர்சித்துள்ளதாகவும் குறிப்பிடப்பட்டுள்ளது.

மேலும், வாக்காளர் பட்டியல் சிறப்பு தீவிர திருத்தம் தொடர்பாக தேர்தல் ஆணையத்திற்குள் கருத்து வேறுபாடு ஏற்பட்டதாக வெளியான தகவல்கள் உண்மையில்லை என தேர்தல் ஆணையம் தெரிவித்துள்ளது.