காஞ்சிபுரம் சங்கர மடத்தில் அமைந்துள்ள மகா பெரியவர் மணிமண்டபத்தில் நடைபெற்ற சந்திரமவுலீஸ்வரர் பூஜையில், ஆர்.எஸ்.எஸ் தலைவர் மோகன் பாகவத் கலந்துகொண்டார்.
காஞ்சிபுரம் ஓரிக்கை பகுதியில் உள்ள சங்கர மடத்தில், மகாபெரியவர் என்று அழைக்கப்படும் சந்திரசேகரேந்திர சரஸ்வதி ஸ்வாமிகளின் நினைவு மணிமண்டபத்திற்கு ஆர்.எஸ்.எஸ் தலைவர் மோகன் பாகவத் வருகை தந்தார். மங்கள வாத்தியங்கள் முழங்க சங்கராச்சாரியார் விஜயேந்திர சரஸ்வதி சுவாமிகளுடன், சந்திரசேகரேந்திர சரஸ்வதி சுவாமிகள் நினைவு மண்டபத்தில் வழிபட்டார். அங்கு நடைபெற்ற சந்திரமவுலீஸ்வரர் பூஜையிலும் மோகன் பாகவத் கலந்து கொண்டார். தொடர்ந்து 60 தம்பதியருக்கு நடந்த சுமங்கலி பூஜையிலும் பங்கேற்றார்.
இதைத்தொடர்ந்து கோ வித்ய அரங்கு, வேத நாத பாடசாலை, ராமாயண பாடசாலை, காமகோட்டி திரிவேணி சங்கீத பாடசாலை போன்றவை குறித்த கண்காட்சியை மோகன் பாகவத் பார்வையிட்டார். தொடர்ந்து, சந்திரசேகரேந்திர சரஸ்வதி சுவாமிகள் உருவச்சிலை நிறுவப்பட்ட கருவறைக்குச் சென்று தரிசனம் செய்தார். சுமார் ஒன்றரை மணி நேரம் காஞ்சி சங்கராச்சாரியார் ஸ்ரீவிஜயேந்திர சரஸ்வதி சுவாமிகளுடன் ஆலோசனையில் ஈடுபட்டதுடன், மணிமண்டபம் பகுதியில் உணவருந்தினார்.
