ஜெம் கிரானைட் உரிமையாளர் வீரமணி மீதான பாலியல் வழக்கில் கைது செய்யப்பட்டுள்ள சாந்தி மற்றும் மகேந்திர சிம்ஹன் ஜாமின் கோரி தாக்கல் செய்த மனு மீது பதிலளிக்க, மத்திய குற்றப்பிரிவு காவல்துறைக்கு சென்னை போக்சோ சிறப்பு நீதிமன்றம் உத்தரவிட்டுள்ளது.
சிறுமிகளை பாலியல் வன்கொடுமை செய்ததாக கிரானைட் தொழிலதிபர் வீரமணி மீது எழுந்த குற்றச்சாட்டில், அவர் கைது செய்யப்பட்டு சிறையில் அடைக்கப்பட்டுள்ளார்.
இந்த வழக்கில், வீரமணிக்கு உடந்தையாக இருந்ததாகக் கூறப்பட்ட சாந்தி, அவரது கணவர் மகேந்திர சிம்ஹன் உள்ளிட்டோர் கடந்த ஆகஸ்ட் 29-ம் தேதி கைது செய்யப்பட்டு, நீதிமன்றக் காவலில் சிறையில் அடைக்கப்பட்டனர்.
இந்த வழக்கில் ஜாமின் கோரி சாந்தி மற்றும் மகேந்திர சிம்ஹன் ஆகியோர் சென்னை போக்சோ சிறப்பு நீதிமன்றத்தில் மனுத்தாக்கல் செய்தனர்.
அந்த மனுக்களில், கடந்த 2019-ம் ஆண்டு நடந்ததாகக் கூறப்படும் சம்பவம் தொடர்பாக, 6 ஆண்டுகள் தாமதமாக கடந்த 2025-ம் ஆண்டு அக்டோபர் 7-ம் தேதி காவல்துறை வழக்குப்பதிவு செய்துள்ளதாகவும், இந்த தாமதத்துக்கு காவல்துறையிடம் எந்த விளக்கமும் இல்லாததால், வழக்கில் சந்தேகம் எழுந்துள்ளதாகவும் தெரிவிக்கப்பட்டுள்ளது.
மேலும், தாங்கள் எந்தக் குற்றத்திலும் ஈடுபடவில்லை என்றும், தங்களுக்கு எதிராக புகார் அளித்தவர்கள் பாதிக்கப்பட்ட சிறுமிகளின் பெற்றோர் அல்லது பாதுகாவலர்கள் இல்லை என்றும் குறிப்பிட்டுள்ளனர்.
பாதிக்கப்பட்ட சிறுமிகள் யாரும் இதுவரை காவல்துறையால் அடையாளம் காணப்படவில்லை என்பதைக் கருத்தில் கொண்டு, தங்களுக்கு ஜாமின் வழங்க வேண்டும் என்றும் கோரியுள்ளனர்.
சென்னை போக்சோ சிறப்பு நீதிமன்ற நீதிபதி பத்மா முன்பாக ஜாமின் மனுக்கள் விசாரணைக்கு வந்தன.
அப்போது, மத்திய குற்றப்பிரிவு காவல்துறை தரப்பில், பாதிக்கப்பட்ட சிறுமிகளின் அடையாளங்கள் மிக ரகசியமாக வைக்கப்பட்டுள்ளதாகவும், குற்றஞ்சாட்டப்பட்டவர்களை நீதிமன்ற காவலில் வைப்பதில் எந்தத் தாமதமும் ஏற்படவில்லை என்றும் விளக்கம் அளிக்கப்பட்டது.
மேலும், சாந்தி மற்றும் அவரது கணவர் மகேந்திர சிம்ஹனுக்கு ஜாமின் வழங்கக் கூடாது என்றும் காவல்துறை தரப்பில் எதிர்ப்பு தெரிவிக்கப்பட்டது.
இருதரப்பு வாதங்களையும் கேட்ட நீதிபதி, வரும் 29-ம் தேதிக்குள் இந்த வழக்கு தொடர்பாக மத்திய குற்றப்பிரிவு காவல்துறை பதில் மனுத்தாக்கல் செய்ய உத்தரவிட்டு, விசாரணையை தள்ளிவைத்தார்.
