ஹார்முஸ் ஜலசந்தியை மீண்டும் திறப்பதற்கான ஈரானின் 7 நாள் போர் நிறுத்த முன்மொழிவை அமெரிக்க அதிபர் ட்ரம்ப் நிராகரித்துள்ளார். மேலும் மீண்டும் ஈரான் மீது தாக்குதல்களைத் தீவிரப் படுத்த ட்ரம்ப் முடிவு செய்துள்ளதாக தகவல்கள் தெரிவிக்கின்றன. இதற்கான காரணம் என்பது குறித்த ஒரு செய்தி தொகுப்பு.
ஐநா பொதுச்சபைக் கூட்டத்தின் இடையே ஈரானின் வெளியுறவுத்துறை அமைச்சர் அப்பாஸ் அராக்சி, ஹார்முஸ் ஜலசந்தியை மீண்டும் திறப்பதற்கான 7 நாள் திட்டத்தை முன்வைத்திருந்தார்.
அமெரிக்கா தனது கடற்படை முற்றுகையை விலக்கிக் கொள்ளவேண்டும்- ஈரான் எண்ணெய் ஏற்றுமதிக்கான பொருளாதாரத் தடைகளைத் தளர்த்த வேண்டும்-லெபனான் உட்பட அனைத்து முனைகளிலும் போர் நிறுத்தத்தைக் கடைப்பிடிக்க வேண்டும் என்பன போன்ற ஈரான் முன்வைத்த நிபந்தனைகளை அமெரிக்கா ஏற்றுக்கொண்டால், மீண்டும் ஹார்முஸ் ஜலசந்தி திறக்கப்படும் என்றும் அப்பாஸ் அராக்சி தெரிவித்திருந்தார்.
ஏற்கெனவே கத்தார் நாட்டின் மத்தியஸ்தர்கள் மூலம் இருநாடுகளும் நேர்மறையான மற்றும் ஆக்கபூர்வமான பேச்சுவார்த்தைகளில் ஈடுபட்டுள்ளன. எனினும், ஈரான் தனது அணுசக்தி திட்டத்தை கைவிடுவது உள்ளிட்ட அமெரிக்காவின் கடுமையான கோரிக்கைகளை முழுமையாக நிறைவேற்றும் என்பதில் அதிபர் ட்ரம்ப் தனிப்பட்ட முறையில் சந்தேகம் கொண்டுள்ளதாக கூறப்படுகிறது.
ஐநா சபைக் கூட்டத்தில் பேசிய அதிபர் ட்ரம்ப், நாட்டின் அரசியல் சூழல் தனது வெளியுறவுக் கொள்கையை பாதிக்காது என்றும், ஈரான் அணு ஆயுதம் பெறுவதை நிச்சயம் தடுப்பேன் என்றும் கூறியிருந்தார்.
ஈரானின் 7 நாள் போர் நிறுத்த முன்மொழிவை நிராகரித்த சில மணி நேரங்களிலேயே, தனது சமூக ஊடகப் பக்கத்தில் ஹார்முஸ் ஜலசந்தியை “ட்ரம்ப் ஜலசந்தி” என்று பெயரிடப்பட்ட புதிய வரைபடம் ஒன்றைப் பகிர்ந்து, அமெரிக்கா அங்கு முழுமையான கட்டுப்பாட்டைக் கொண்டுள்ளதாகக் குறிப்பிட்டுள்ளார்.
ஈரானில் பொருளாதார நெருக்கடி தீவிரமடைந்துள்ள நிலையில் தொடர்ச்சியான பொருளாதார நெருக்கடி ஈரானை தங்கள் நிபந்தனைகளுக்கு பணிய வைக்கும் என்று ட்ரம்ப் நம்புவதாக கூறப்படுகிறது.
இந்நிலையில் கடந்த ஜூன் மாதம் ஏற்படுத்தப்பட்ட புரிந்துணர்வு ஒப்பந்த நிபந்தனைகளுக்கே ஒப்புதல் அளித்துள்ள ஈரானின் இஸ்லாமிய புரட்சிகரக் காவல் படை, எந்தவொரு புதிய உடன்பாடுகளையும் ஏற்க மறுத்து, நீண்டகாலப் போருக்குத் தயாராக இருப்பதாக அறிவித்துள்ளது.
ஈரான் மீதான வான்வழித் தாக்குதல்களை அமெரிக்கா மீண்டும் தொடங்கும் என்று ட்ரம்ப் தனது அதிகாரிகளிடம் தெரிவித்துள்ளதாக ஊடகங்கள் செய்தி வெளியிட்டுள்ளன
ஆயுத இருப்பைப் பாதுகாப்பதற்காக உடனடி போரைத் தவிர்க்கும் அதிபர் ட்ரம்ப், நவம்பர் மாதம் நடைபெறவுள்ள அமெரிக்க இடைக்காலத் தேர்தலுக்குப் பிறகே ஈரான் மீதான வான்வழித் தாக்குதல்களை மீண்டும் தீவிரப் படுத்துவார் என்று எதிர்பார்க்கப்படுகிறது.
இதற்கிடையே சவூதி ஆதரவு பெற்ற, சர்வதேச அளவில் அங்கீகரிக்கப்பட்ட யேமன் அரசின் மீது தங்கள் தாக்குதலைத் தீவிரப்படுத்தியுள்ள ஹவுதிகள் சவூதி அரேபியா மீதும் தாக்குதல்களை நடத்தி வருகின்றனர்.
மெக்கா ஒப்பந்தத்தின் அடிப்படையில் துருக்கி மற்றும் பாகிஸ்தான் ஆகிய நாடுகளின் பாதுகாப்பு அதிகாரிகள், பாதுகாப்பு நிலைமையை மதிப்பிடுவதற்கும், உளவுத் தகவல்களைப் பகிர்தல், ராணுவ ஒருங்கிணைப்பு மற்றும் படை ஒருங்கிணைப்பு ஆகியவற்றில் ஒத்துழைப்பு குறித்து விவாதிப்பதற்கும் ரியாத்தில் சந்தித்து பேசியுள்ளனர்.
