2004ல் நடந்த மாணவி தற்கொலை; ஜெம் வீரமணி மீது மேலும் ஒரு வழக்கு

2004-ம் ஆண்டு 11-ம் வகுப்பு மாணவி தற்கொலை செய்துகொண்ட விவகாரம் தொடர்பாக, ஜெம் வீரமணி மீது சிறப்புப் புலனாய்வுக் குழுவினர் புதிய வழக்கு ஒன்றை பதிவு செய்துள்ளதாக தகவல் வெளியாகியுள்ளது

பாலியல் வன்கொடுமைக்கு ஆளாக்கப்பட்டதாக சிறுமி ஒருவர் அளித்த புகாரின் பேரில், ஜெம் வீரமணி உள்ளிட்ட நான்கு பேரை போலீசார் போக்சோ சட்டத்தின் கீழ் கைது செய்து சிறையில் அடைத்தனர்.

இதனிடையே, 2004-ம் ஆண்டு தனது மகள் வீரமணியால் பாலியல் தொல்லைக்கு உள்ளாக்கப்பட்டதாக மற்றொரு பெண்ணின் தாயார் அளித்த புகாரின் அடிப்படையில், வீரமணி மீது 2-வது போக்சோ வழக்கு பதிவு செய்யப்பட்டது.

இதையடுத்து, சிறப்புப் புலனாய்வுக் குழுவினர் பழைய புகார் குறித்தும் விசாரணை நடத்தினர்

அதன் தொடர்ச்சியாக, மாணவியை தற்கொலைக்குத் தூண்டியதாக வீரமணி மீது புதிய வழக்குப்பதிவு செய்யப்பட்டுள்ளதாக கூறப்படுகிறது

இந்த வழக்கு தொடர்பாக விசாரணை தொடர்ந்து நடைபெற்று வருகிறது.