ஃப்ளை துபாய் விமானத்தைத் தரையில் மோதி நொறுக்க திட்டமிட்டிருந்த துணை பைலட்டின் சதியை இந்திய பைலட் துணிச்சலுடன் முறியடித்த சம்பவத்தின் முழு பின்னணியை தற்போது பார்க்கலாம்.
துபாயில் இருந்து 180 பயணிகளுடன் போயிங் 737 மேக்ஸ் 8 என்ற விமானம் இஸ்ரேல் தலைநகர் டெல் அவிவை நோக்கி புறப்பட்டது.
விமானம் புறப்பட்ட சில மணி நேரத்தில் விமானிகள் உட்கார்ந்திருந்த கட்டுப்பாட்டு அறையில் பைலட், துணை பைலட் இடையே சண்டை ஏற்பட்டுள்ளது.
தொடர்ந்து, விமானியை துணை விமானி கத்தியால் குத்தியதால் விமானத்தை இயக்குவதில் சிரமம் ஏற்பட்டுள்ளது.
உடனடியாக, விமானி கட்டுப்பாட்டு அறையை திறந்ததால் விமான ஊழியர்கள் மற்றும் பயணிகள் உதவியுடன் துணை விமானி மடக்கி பிடிக்கப்பட்டார்.
தொடர்ந்து, அதே விமானத்தில் சாதாரண உடையில் பயணித்த வேறு இரண்டு விமானிகளால் விமானம் இயக்கப்பட்டுள்ளது.
நடுவானில் விமானம் பறந்துகொண்டிருந்தபோது, இருவருக்கும் இடையே ஏற்பட்ட தகராறல் விமானம் செங்குத்தாக கீழ் நோக்கி கீழிறங்கியது.
விமானம் 30 ஆயிரம் அடி உயரத்தில் இருந்து சட்டென 10 ஆயிரம் அடிக்குக் கீழே இறங்கி மீண்டும் அதிக உயரத்துக்கு பறந்ததால் பயணிகள் பீதியில் அலறினர்.
உடனடியாக, விமான பணியாளர்கள் அவசர கால எச்சரிக்கைகளை இஸ்ரேல் நாட்டுக்குக் கொடுத்தனர்.
பொது அவசர நிலையை அறிவிக்கும் ‘7700’ என்ற எச்சரிக்கையும், விமானம் வழக்கத்துக்கு மாறாக 15 ஆயிரம் அடி உயரத்தில் தாழ்வாகப் பறந்ததால் ‘ஸ்குவாக் 7500’ என்ற விமான கடத்தல் எச்சரிக்கையும் விடப்பட்டது.
இதனை அறிந்த இஸ்ரேல் பிரதமர் பெஞ்சமின் நெதன்யாகு பாதுகாப்புத்துறை அமைச்சருடன் அவசர ஆலோசனை நடத்தினார்.
விமானம் கடத்தப்பட்டதாக முதலில் தகவல்கள் பரவியதால், பயணிகள் விமானத்தைச் சுற்றிவளைக்க இஸ்ரேல் போர் விமானங்கள் களத்தில் இறக்கப்பட்டன.
அதற்குள் பயணிகள் விமானம், ஜோர்டன் வான்வெளிக்குள் நுழைந்து சிறிது நேரத்தில் சவுதி அரேபியா நோக்கி திரும்பியது.
பின்னர், சவுதி அரேபியாவில் உள்ள தபூக் விமான நிலையத்தில் பத்திரமாக விமானம் தரையிறக்கப்பட்டதால் பயணிகள் மகிழ்ச்சியடைந்தனர்
இது குறித்து தீவிர விசாரணைக்கு உத்தரவிடப்பட்டுள்ள நிலையில், நடுவானில் நடந்த சம்பவம் சர்வதேச அளவில் பெரும் அதிர்ச்சியை ஏற்படுத்தியுள்ளது.
