மக்கள் பிரதிநிதிகளின் அலட்சியப் போக்கால் சிவகங்கை ரயில்நிலையம் 50 ஆண்டுகளாக வளர்ச்சி அடையவில்லை என பொதுமக்கள் வேதனை தெரிவித்துள்ளனர். மக்களின் மனக்குமுறலை விவரிக்கிறது இந்த செய்தித்தொகுப்பு………
தெற்கு ரயில்வேயின் மதுரை கோட்டத்திற்குட்பட்ட சிவகங்கை ரயில் நிலையம், கடந்த 1930 ஆம் ஆண்டு முதல் செயல்பட்டு வருகிறது. அப்போது சிறிய ரயில் நிலையமாக இயங்கி வந்தது. இந்த நிலையில், 1985-ஆம் ஆண்டு சிவகங்கை ஒருங்கிணைந்த ராமநாதபுரம் மாவட்டத்தில் இருந்து தனி மாவட்டமாக பிரிக்கப்பட்டது. ஒரு மாவட்டத்தின் தலைநகரமாக மாறிய நிலையிலும், சிவகங்கை ரயில்நிலையத்தின் வளர்ச்சி மிகப்பெரிய உயரத்தை எட்டவில்லை.
சிவகங்கையில் ஆட்சியர் அலுவலகம், காவல் கண்காணிப்பாளர் அலுவலகம், நீதிமன்றம் என முக்கிய அலுவலகங்கள் செயல்பட்டு வரும் சூழலில், இங்குள்ள ரயில்நிலையம் தரம் உயர்த்தப்படவில்லை. இதனால் மாவட்ட தலைநகருக்கு வருகை தரும் வெளியூர் மக்கள், பேருந்துகளை நாட வேண்டிய நிலைக்குத் தள்ளப்பட்டுள்ளனர். தினசரி மற்றும் வாராந்திர ரயில்கள் என 12 ரயில்கள் மட்டுமே சிவகங்கை ரயில் நிலையத்தில் நிற்பதால், ரயிலில் பயணிக்க விரும்புவோர் மதுரைக்கு செல்ல வேண்டிய அவலம் நீடிக்கிறது.
காங்கிரஸ் ஆட்சியில் நீண்டகாலமாக நிதித்துறை அமைச்சர், உள்துறை அமைச்சர் என பல்வேறு பதவிகளை வகித்த, காரைக்குடியைச் சேர்ந்த ப.சிதம்பரம், அவரது மகனும் சிவகங்கை எம்.பி.யுமான கார்த்தி சிதம்பரம் ஆகியோர் சிவகங்கை ரயில்நிலையத்தை மேம்படுத்த எந்த நடவடிக்கையும் மேற்கொள்ளவில்லை என பொதுமக்கள் குற்றம்சாட்டுகின்றனர். இருவரும் மத்திய அரசின் திட்டங்களை காரைக்குடிக்கு கொண்டு சென்றதால் சிவகங்கை வளர்ச்சி அடையவில்லை என்றும் கூறுகின்றனர்.
சிவகங்கை ரயில் நிலையத்திற்கு தினசரி 950 பயணிகள் மட்டுமே வந்து செல்வதாக காரணம் காட்டி , அங்குள்ள கேண்டீனும் மூடப்பட்டுள்ளதாக பொதுமக்கள் வேதனை தெரிவித்துள்ளனர். சிவகங்கைக்கு கூடுதல் ரயில் சேவையை பெற்றுத் தருவதுடன் இந்த மார்க்கத்தில் இயங்கும் ரயில்கள் நின்று செல்ல நடவடிக்கை எடுக்கப்பட வேண்டும் என்பதே மக்களின் எதிர்பார்ப்பாக உள்ளது.
தமிழ் ஜனம் செய்திகளுக்காக சிவகங்கையில் இருந்து செய்தியாளர் சுப்பிரமணியன்
