ரஷ்ய எரிபொருள் விவகாரத்தில் அமெரிக்க அதிபர் ட்ரம்பின் இரட்டை நிலைப்பாடு மீண்டும் அம்பலமாகியுள்ளது. போருக்குத் தீர்வு காண்பது எப்படி என்பது குறித்து விவாதிப்பதற்காக உக்ரைனின் தூதுக்குழு அமெரிக்காவில் இருக்கும் நிலையில், ரஷ்யாவுடன் டீசல் இறக்குமதி ஒப்பந்தம் செய்யப்பட்டுள்ளதாக அதிபர் ட்ரம்ப் அறிவித்துள்ளார். அது பற்றிய ஒரு செய்தி தொகுப்பு.
2022-ல் தொடங்கிய உக்ரைன் போர் நான்கு ஆண்டுகளுக்கும் மேலாக நீடித்து வருகிறது. உக்ரைன் மீது போர் தொடுத்ததற்காக ரஷ்யா மீது பொருளாதார தடைகளை அமெரிக்கா விதித்தது. ரஷ்யாவிடமிருந்து எண்ணெய் கொள்முதல் செய்யும் இந்தியா உள்ளிட்ட நாடுகள் மீதும் வரி விதித்த அமெரிக்க அதிபர், கடந்த ஆண்டு அக்டோபரில் ரஷ்ய எண்ணெய் நிறுவனங்களையும் தடை பட்டியலில் சேர்த்தது.
கடந்த செப்டம்பர் 18ம் தேதி அமெரிக்க காங்கிரஸின் இரு அவைகளிலும் நிறைவேற்றப்பட்ட , ரஷ்யாவிடம் எண்ணெய் வாங்கும் நாடுகளுக்கு 100 சதவீதம் வரை தண்டனை வரி விதிக்கும் சட்டத்துக்கு ஒப்புதல் வழங்கி அமெரிக்க அதிபர் ட்ரம்ப் கையெழுத்திட்டார்.
உலகளாவிய சந்தைகளை நிலைப்படுத்துவதற்காக 2022-ல் ரஷ்ய எண்ணெயை வாங்குமாறு இந்தியாவிடம் அமெரிக்கா குறிப்பாகக் கேட்டுக்கொண்டதாகவும், ஆனால் பின்னர் அதே கொள்முதல் மீது வரிகளை அந்நாடு விதித்ததாகவும் கூறியுள்ள மத்திய வெளியுறவுத் துறை அமைச்சர் ஜெய்சங்கர், 2024-ல் ஐரோப்பிய ஒன்றியம் ரஷ்யாவுடன் 78.02 பில்லியன் டாலர் மதிப்பிலான வர்த்தகத்தை மேற்கொண்டதைச் சுட்டிக்காட்டியிருந்தார்.
இந்த அடிப்படையில் ரஷ்ய எண்ணெய் விவகாரத்தில் இந்தியாவை மட்டும் தனியாகக் குறிவைப்பது நியாயமற்றது என்று மத்திய அரசு தொடர்ந்து கூறி வருகிறது.
இந்நிலையில் தான், ரஷ்ய அதிபர் புதினுடன் நடத்திய தொலைபேசி உரையாடலைத் தொடர்ந்து, அமெரிக்கா மற்றும் சர்வதேச சந்தைக்கு உடனடியாக 3,00,000 டன் டீசலை வழங்க ரஷ்யா ஒப்புக்கொண்டுள்ளதாக அதிபர் ட்ரம்ப் அறிவித்துள்ளார்.
மேலும் இந்த டீசலைப் பெறுவதற்காக, ரஷ்யா மீது விதிக்கப்பட்டிருந்த எரிபொருள் ஏற்றுமதி தடைகளை அடுத்த ஆண்டு ஏப்ரல் வரை அமெரிக்க கருவூலத்துறை தற்காலிகமாக நீக்கியுள்ளது.
ஈரான் போரினால் உலகளவில் கச்சா எண்ணெய் விலை கடுமையாக உயர்ந்துள்ள நிலையில் வரும் நவம்பர் 3-ல் வரவிருக்கும் அமெரிக்க இடைக்காலத் தேர்தலுக்காக ட்ரம்ப் இந்த அதிரடி முடிவை எடுத்துள்ளதாக கூறப்படுகிறது.
இந்தியா உள்ளிட்ட பிற நாடுகள் ரஷ்யாவிடம் எண்ணெய் கொள்முதல் செய்தால் அது உக்ரைன் போருக்கு நிதி வழங்குவதாகும் என்று கூறிவிட்டு, தனது தேவைக்காக ரஷ்யாவுடன் டீசல் ஒப்பந்தம் போட்டிருப்பது அமெரிக்காவின் சுயநலம் மற்றும் இரட்டை நிலையை எடுத்துக்காட்டுவதாக புவிசார் அரசியல் ஆய்வாளர்கள் விமர்சனம் செய்துள்ளனர்.
இதற்கிடையே ரஷ்யாவின் எரிசக்தி ஏற்றுமதி மீதான கட்டுப்பாடுகளைத் தளர்த்துவது, பெட்ரோலியப் பொருட்களை விற்பனை செய்ய அந்நாட்டை அனுமதிப்பது என்ற ட்ரம்பின் அதிரடி முடிவை கடுமையாக விமர்சித்துள்ள உக்ரைன் அதிபர் ஜெலன்ஸகி, இது போருக்கான முதலீடு என்று குற்றம்சாட்டியுள்ளார்.
