லடாக்கின் லே மாவட்டத்தில், சனிக்கிழமையன்று ராணுவ வாகனம் ஒன்று பள்ளத்தாக்கில் விழுந்ததில் 9 வீரர்கள் உயிரிழந்தனர், ஒருவர் படுகாயமடைந்தார் என்று அதிகாரிகள் தெரிவித்தனர்.
கியாரி நகருக்கு 7 கி.மீ. தொலைவில் 10 ராணுவ வீரர்கள் சென்ற வாகனம் லேயில் இருந்து நியோமா நோக்கிச் சென்று கொண்டிருந்தபோது, சாலையை விட்டு விலகி ஆழமான பள்ளத்தாக்கில் கவிழ்ந்து விபத்துக்குள்ளானது. இந்த விபத்தில் வாகனத்தில் பயணித்த 9 ராணுவ வீரர்கள் உயிரிழந்துள்ளனர்.
இந்நிலையில், விபத்தில் உயிரிழந்த ராணுவ வீரர்களுக்கு பிரதமர் நரேந்திர மோடி, பாதுகாப்புத்துறை அமைச்சர் ராஜ்நாத் சிங், மத்திய உள்துறை அமைச்சர் அமித்ஷா மற்றும் தமிழக ஆளுநர் ஆர்.என். ரவி உள்ளிட்ட பலர் இரங்கல் தெரிவித்துள்ளனர்.
மறைந்த ராணுவ வீரர்களுக்கு இந்திய ராணுவ தளபதி மனோஜ் பாண்டே ஆழ்ந்த இரங்கலை தெரிவித்துள்ளார். இந்திய ராணுவத்தின் அதிகாரப்பூர்வ எக்ஸ் கணக்கில், இந்திய ராணுவ தளபதி மனோஜ் பாண்டே மற்றும் இந்திய ராணுவத்தின் அனைத்து தரப்புகளும் லடாக்கில் நடந்த ஒரு சோகமான மற்றும் துரதிர்ஷ்டவசமான சாலை விபத்தில் ஒன்பது துணிச்சலான இதயங்களை இழந்ததற்கு ஆழ்ந்த வருத்தத்தைத் தெரிவித்துள்ளனர். அவர்களை இழந்து வாடும் குடும்பங்களுக்கு ஆழ்ந்த இரங்கலைத் தெரிவிக்கிறோம் என்று பதிவிட்டுள்ளனர்.
