தூத்துக்குடி மாவட்டத்தில் பெற்ற தாயைப் பராமரிக்கத் தவறிய மகனுக்கு அம்மாவட்ட ஆட்சியர் அதிரடியாகத் தண்டனை விதித்து உத்தரவிட்டார்.
தூத்துக்குடி மாவட்டம், ஏரல் அருகே உள்ளது வாழவல்லான் கிராமம். இந்தப் பகுதியைச் சேர்ந்த தம்பதி இசக்கி – மாலையம்மாள். இவர்களுக்கு மூன்று மகன்கள் உள்ளனர். இதில், கணவர் இசக்கி உயிரிழந்துவிட்டார். இதனால், மாலையம்மாள் தனியாக வசித்து வந்தார்.
இதனிடையே, மாலையம்மாளைப் பராமரிக்க அவரது மூத்த மகன் முன்வரவில்லை எனக் கூறப்படுகிறது. இதனால், தனது மூத்த மகன் முத்துக்குமார் மீது நடவடிக்கை எடுக்க வேண்டும் என மாவட்ட ஆட்சியரிடம் மாலையம்மாள் புகார் மனு அளித்தார். அதன்பேரில், அவரது மகன் முத்துக்குமார் ஒவ்வொரு மாதமும் அவரது தாயாருக்கு 5 ஆயிரம் ரூபாய் வழங்க வேண்டும் எனக் கடந்த 2021-ஆம் ஆண்டு டிசம்பர் மாதம் மாவட்ட ஆட்சியர் உத்தரவிட்டார்.
ஆனால், மாலையம்மாள் பராமரிப்புக்காக, முத்துகுமார் பணம் வழங்கவில்லை எனக் கூறப்படுகிறது. இதனால், பாதிக்கப்பட்ட மாலையம்மாள் மாவட்ட ஆட்சியரிடம் மீண்டும் புகார் மனு அளித்தார்.
அதன்பேரில், பெற்றோர் மற்றும் மூத்த குடிமக்கள் பராமரிப்புச் சட்டத்தின் கீழ் முத்துக்குமாருக்கு 3 மாதம் சிறை தண்டன விதித்து தூத்துக்குடி மாவட்ட ஆட்சியர் உத்தரவிட்டார்.
