தமிழகத்தின் காவிரி டெல்டா மாவட்ட விவசாயிகள் பெரிதும் நம்பியுள்ள 120 அடி உயரமுள்ள மேட்டூர் அணையில் தற்போதைய நீர்மட்டம் 49.97 அடியாகக் குறைந்துள்ளது.
குறுவை, சம்பா சாகுபடி பாசனத்திற்காக மேட்டூர் அணையிலிருந்து கடந்த ஜூன் 12-ந் தேதி தண்ணீர் திறக்கப்பட்டது. தொடர்ந்து, பாசனத் தேவைக்கு ஏற்ப அதிகரித்தும், குறைத்தும் தண்ணீர் திறக்கப்பட்டு வருகிறது. இதன் மூலம் சேலம், கரூர், திருச்சி, தஞ்சாவூர், திருவாரூர், நாகை, மயிலாடுதுறை, கடலூர், புதுக்கோட்டை மாவட்டங்களில் உள்ள 50 ஆயிரத்திற்கும் மேற்பட்ட நிலம் பாசன வசதி பெறுகிறது.
இந்நிலையில், காவிரி நீர்ப்பிடிப்புப் பகுதிகளில் பருவ மழை பொய்த்துப் போனதால் அணைக்கு வரும் நீரின் அளவு குறைந்து காணப்பட்டது. இதனால் மேட்டூர் அணையின் நீர்மட்டம் வேகமாகக் குறைந்து வருகிறது.
இன்றைய நிலவரப்படி மேட்டூர் அணையின் நீர்மட்டம் 49.97 அடியாக இருந்தது. அணைக்கு வரும் நீரின் அளவு வினாடிக்கு 792 கன அடியிலிருந்து 549 கன அடியாக குறைந்துள்ளது. அணையிலிருந்து தொடர்ந்து, வினாடிக்கு 8 ஆயிரம் கன அடி வீதம் தண்ணீர் வெளியேற்றப்பட்டு வருகிறது. அணையில் தற்போது, 17.79 டி.எம்.சி. தண்ணீர் இருப்பு உள்ளது. அணைக்கு வரும் நீரின் அளவை விடப் பாசனத்திற்காகத் திறக்கப்படும் நீரின் அளவு அதிகமாக உள்ளதால், அணையின் நீர் மட்டம் தொடர்ந்து குறைந்து வருகிறது.
மேலும், ஓரிரு நாட்களில் அணையின் நீர்மட்டம் 45 அடியை நெருங்கும் என்பதால் சுரங்க மின் நிலையத்தில் தண்ணீர் திறப்பு நிறுத்தப்பட்டு அணையின் கீழ் மட்ட மதகுகள் வழியாகப் பாசனத்திற்குத் திறக்கப்படும். இதனால், சுரங்க மின் நிலையத்தில் உற்பத்தியாகும் மின் உற்பத்தி பாதிக்கும் அபாயம் ஏற்பட்டுள்ளது குறிப்பிடத்தக்கது.
