மாண்டெனெக்ரோ நாட்டில் உள்ள பிரெஸ்னா கிராமத்தில் கடந்த மாதம் ‘சோம்பேறி குடிமகன்’ போட்டி தொடங்கியது. இந்தப் போட்டியில் மொத்தம் 21 பேர் கலந்து கொண்டனர்.
இந்த போட்டியைப் பொறுத்தவரை உட்காரவோ, நிற்கவோ அனுமதி இல்லை. 24 மணிநேரமும் மெத்தையிலேயே படுத்திருக்க வேண்டும். உணவு உண்பதாக இருந்தாலும், படுத்துக் கொண்டுதான் உணவு உண்ண வேண்டும். தவறுதலாகப் படுக்கையில் இருந்து எழுந்தால்கூட உடனடியாக போட்டியிலிருந்து வெளியேற்றப்படுவார்கள்.
போட்டியாளர்களுக்கு 8 மணிநேரத்துக்கு ஒருமுறை 10 நிமிடங்கள் கழிப்பறை செல்ல அனுமதி அளிக்கப்படுகிறது.
தற்பொழுது, 27 நாட்கள் கடந்துள்ள நிலையில், 7 பேர் விடாமுயற்சியுடன் போட்டியில் உள்ளனர். இடையிடையே 14 பேர் போட்டியில் இருந்து விலகியுள்ளனர்.
இந்தப் போட்டியில் கடைசி வரை போட்டியின் விதிமுறையே மீறாமல் இருப்பவருக்கு ‘சோம்பேறி குடிமகன்’ என்ற விருதுடன் 1,000 யூரோக்கள் அதாவது, இந்திய மதிப்பில் 88,000 ரூபாய் பரிசுத் தொகையாக வழங்கப்படவுள்ளது.
இதற்கிடையே, படுக்கையில் உள்ள போட்டியாளர்களின் உடல்நிலையும் தொடர்ந்து மருத்துவக் குழுவால் கண்காணிக்கப்பட்டு வருகின்றது.
2022-ஆம் ஆண்டு நடைபெற்ற இந்தப் போட்டி 117 மணிநேரத்தில் முடிவுக்கு வந்தது. இந்தாண்டு இன்னும் 7 பேர் விடாமுயற்சியுடன் வெற்றிக்காகப் போராடிக் கொண்டு இருக்கின்றனர் என்பது குறிப்பிடத்தக்கது.
