உலகின் அதிக செல்வாக்கு மிகுந்த தலைவர்கள் பட்டியலில் பாரதப் பிரதமர் மோடி தொடர்ந்து முதலிடம் வகிப்பது, அமெரிக்காவின் மார்னிங் கல்சன்ட் நிறுவனம் நடத்திய ஆய்வில் தெரியவந்திருக்கிறது. இதற்கு பா.ஜ.க. தலைவர்கள் பாராட்டும் வாழ்த்தும் தெரிவித்திருக்கின்றனர்.
அமெரிக்காவைச் சேர்ந்த மார்னிங் கன்சல்ட் என்கிற நிறுவனம், மக்களால் தேர்ந்தெடுக்கப்பட்ட தலைவர்களுக்கு உள்ள செல்வாக்கு குறித்து ஒவ்வொரு ஆண்டும் ஆய்வு நடத்தி அறிக்கை வெளியிட்டு வருகிறது. அந்த வகையில், இந்த நிறுவனம் சமீபத்தில் நடத்திய ஆய்வு முடிவுகளை வெளியிட்டிருக்கிறது. இதில்தான், பாரதப் பிரதமர் நரேந்திர மோடி, உலகில் அதிக செல்வாக்கு மிகுந்த தலைவர்கள் பட்டியலில் முதலிடத்தில் இருப்பதாகத் தெரிவித்திருக்கிறது.
பிரதமர் மோடியின் தலைமையை ஏற்பதாக 76 சதவிகிதம் பேர் தெரிவித்திருக்கிறார்கள். 18 சதவிகிதம் பேர் எதிர்ப்பதாகவும், 6 சதவிகிதம் பேர் கருத்துக் கூற விரும்பவில்லை என்றும் தெரிவித்திருக்கிறார்கள். இதற்கு முன்பு நடத்தப்பட்ட ஆய்விலும் பிரதமர் மோடிதான் முதலிடத்தில் இருந்தார் என்பது குறிப்பிடத்தக்கது.
இப்பட்டியலில் 2-வது இடத்தில் சுவிட்சர்லாந்து பிரதமர் அலைன் பெர்செட் இருக்கிறார். இவருக்கு 64 சதவிகித மக்களின் ஆதரவு இருக்கிறது. அதேபோல, மெக்ஸிகோ அதிபர் ஆண்ட்ரஸ் மானுவல் லோபஸ் ஒப்ராடோர் 61 சதவிகித மக்கள் ஆதரவுடன் 3 இடத்தில் இருக்கிறார். அதேசமயம், அமெரிக்க அதிபர் ஜோ பைடனுக்கு 40 சதவிகித மக்களின் ஆதரவும், கனட பிரதமர் ஜஸ்டின் ட்ரூடோவுக்கு 37 சதவிகித மக்களின் ஆதரவும், இங்கிலாந்து பிரதமர் ரிஷி சுனக்குக்கு 27 சதவிகித மக்களின் ஆதரவும் மட்டுமே கிடைத்திருக்கிறது.
இந்த நிலையில், இதுகுறித்து பா.ஜ.க. தலைமை செய்தித் தொடர்பாளர் அனில் பலூனி தனது சமூக வலைத்தளப் பக்கத்தில் வெளியிட்டிருக்கும் பதிவில், “ஜி20 உச்சி மாநாட்டுக்குப் பின் உலகில் அதிக செல்வாக்கு பெற்ற தலைவராக பாரதப் பிரதமர் நரேந்திர மோடி திகழ்கிறார்” என்று குறிப்பிட்டிருக்கிறார்.
இதுகுறித்து மத்திய அமைச்சர் ஷோபா கரந்த்லாஜே கூறுகையில், “சர்வதேச அளவில் நம்பிக்கை மற்றும் தலைமைத்துவத்தின் இணையற்ற அடையாளமாக பிரதமர் மோடி திகழ்கிறார்” என்று தெரிவித்திருக்கிறார்.
