சிறந்த சுற்றுலா கிராமமாக தமிழகத்தின் நீலகிரி மாவட்டம் கேத்தி பள்ளத்தாக்கில் உள்ள உல்லாடா கிராமம் தேர்வு செய்யப்பட்டிருக்கிறது. டெல்லியில் வரும் 27-ம் தேதி நடைபெறும் விழாவில் விருது வழங்கப்படுகிறது.
தேசிய அளவில் சிறந்த சுற்றுலா கிராமங்களை தேடும் முயற்சியில் மத்திய அரசு ஈடுபட்டிருக்கிறது. இதற்காக, சிறந்த சுற்றுலா கிராம போட்டியை மத்திய அரசு அறிவித்தது. இத்திட்டத்தை மத்திய சுற்றுலாத்துறை அமைச்சர் கிஷண் ரெட்டி கடந்த பிப்ரவரி மாதம் தொடங்கி வைத்தார். இத்திட்டத்தின் முக்கிய நோக்கமே, உள்ளூரின் கலை, கலாச்சாரம் மற்றும் மக்களின் வாழ்க்கை முறையை மேம்படுத்தி, பாதுகாக்கும் கிராமங்களை கௌரவிப்பதுதான். இதற்காக தனி இணையதளம் தொடங்கப்பட்டது. இத்திட்டத்தில் அனைத்துத் தரப்பினரும் கலந்துகொள்ள வேண்டும் என்று பிரதமர் நரேந்திர மோடி அறிவுறுத்தி இருந்தார்.
இதையடுத்து, மாநிலங்கள் மற்றும் யூனியன் பிரதேசங்களில் இருந்து 795 விண்ணப்பங்கள் மத்திய சுற்றுலா அமைச்சகத்திற்கு வந்தன. இந்த விண்ணப்பங்கள் பரிசீலனை செய்யப்பட்டதில், 2023-ம் ஆண்டுக்கான தேசிய அளவில் சிறந்த சுற்றுலா கிராமமாக தமிழகத்தின் நீலகிரி மாவட்டம் கேத்தி பள்ளத்தாக்கில் உள்ள உல்லாடா கிராமம் தேர்வு செய்யப்பட்டிருக்கிறது. இதற்கான விருது டெல்லியில் வரும் 27-ம் தேதி நடைபெறும் விழாவில் வழங்கப்படுகிறது. இதை பெறுவதற்காக உல்லாடா கிராமத் தலைவர் மாதன் தலைமையிலான குழுவினர் டெல்லிக்கு சென்றிருக்கின்றனர்.
