தமிழகத்தில் அக்டோபர் மாதம் 17-ம் தேதி வெளியிடப்படும் என்று அறிவிக்கப்பட்டிருந்த வரைவு வாக்காளர் பட்டியல், தற்போது அக்டோபர் 27-ம் தேதி வெளியிடப்படும் என்று தமிழக தலைமைத் தேர்தல் அதிகாரி சத்யபிரதா சாகு அறிவித்திருக்கிறார்.
தமிழகத்தைப் பொறுத்தவரை, ஒவ்வொரு ஆண்டும் வாக்காளர் பட்டியல் சரிபார்க்கப்பட்டு, செப்டம்பர் முதல் டிசம்பர் வரையிலான காலக்கட்டத்தில் திருத்தப் பணிகள் நடைபெற்று வருகின்றன. இந்த சமயத்தில் வாக்காளர் பட்டியலில் பெயர் சேர்த்தல், நீக்குதல், முகவரி மாற்றம் மற்றும் திருத்தம் போன்ற பணிகளுக்கு விண்ணப்பங்கள் பெறப்பட்டு, கள ஆய்வு செய்யப்படும். இதன் பிறகு, ஜனவரி மாதத்தில் இறுதி வாக்காளர் பட்டியல் வெளியிடப்படும்.
அதேபோல, வாக்காளர் பட்டியல் திருத்தப் பணிகள் தொடங்கும் நாளன்று, சரிபார்ப்புக்கு வசதியாக வரைவு வாக்காளர் பட்டியல் வெளியிடப்படும். அந்த வகையில், இந்தாண்டுக்கான வாக்காளர் பட்டியல் திருத்தப் பணிகள் வரும் அக்டோபர் மாதம் 17-ம் தேதி தொடங்கும் என்றும், அன்றையதினமே வாக்காளர் பட்டியல் வெளியிடப்படும் என்றும் அறிவிக்கப்பட்டிருந்தது. இந்த சூழலில், தற்போது வரைவு வாக்காளர் பட்டியல் வெளியிடும் தேதி திடீரென மாற்றப்பட்டிருக்கிறது.
இதுகுறித்து சென்னை தலைமைச் செயலகத்தில் தமிழக தலைமைத் தேர்தல் அதிகாரி சத்ய பிரதா சாகு செய்தியாளர்களிடம் கூறுகையில், “தமிழகத்தில் அக்டோபர் 17-ம் தேதி வரைவு வாக்காளர் பட்டியல் வெளியிடப்படும் என்று அறிவிக்கப்பட்டிருந்தது. ஆனால், தற்போது நிர்வாகக் காரணங்களுக்காக வரைவு வாக்காளர் பட்டியல் வெளியிடப்படும தேதி மாற்றப்பட்டிருக்கிறது. அதன்படி, அக்டோபர் 17-ம் தேதிக்கு பதிலாக அக்டோபர் 27-ம் தேதி வெளியிடப்படும்.
இதற்கான அட்டவணையை இந்திய தேர்தல் ஆணையம் வெளியிட்டிருக்கிறது. அதன்படி, வரைவு வாக்காளர் பட்டியல் வெளியிடப்படும் அன்றைய தினமே வாக்காளர் பட்டியல் திருத்தப் பணிகளும் தொடங்கும். ஆகவே, அக்டோபர் 27-ம் தேதி முதல் டிசம்பர் 12-ம் தேதி வரைவு வாக்காளர் பட்டியலில் பெயர் சேர்த்தல், நீக்குதல், முகவரி மாற்றம் உள்ளிட்ட திருத்தங்களுக்கான விண்ணப்பங்களை அளிக்கலாம்.
வாக்காளர் பட்டியல் திருத்தப் பணிகள் நடக்கும் காலக்கட்டத்தில் பொதுமக்களின் வசதிக்காக வாக்குச்சாவடிகளில் வார இறுதி நாட்களான சனி மற்றும் ஞாயிற்றுக்கிழமைகளில் சிறப்பு முகாம்கள் நடத்தப்படும். இந்த முகாம்களில் பெறப்பட்ட விண்ணப்பங்கள், டிசம்பர் 26-ம் தேதி வரை பரிசீலிக்கப்படும். பின்னர், இதனடிப்படையில் இறுதி வாக்காளர் பட்டியல் தயாரிக்கப்பட்டு ஜனவரி 5-ம் தேதி மக்கள் பார்வைக்காக வெளியிடப்படும்.
வாக்காளர் பட்டியல் திருத்த காலக்கட்டத்தில் ஆதார் இணைப்புக்கான விண்ணப்பத்தையும் அளிக்கலாம். பல மாவட்டங்களில் மாவட்ட நிர்வாகங்கள் ஆதார் இணைப்புக்கான முகாம்களை நடத்தி வருகின்றன. ஆனால், நகர்ப்புறங்களில் ஆதார் இணைப்பு குறைவாக உள்ளது” என்றார்.
