தமிழகத்திற்குத் தண்ணீர் கொடுக்க வேண்டும் என்று, காவிரி மேலாண்மை ஆணையம் உத்தரவை எதிர்த்து, உச்ச நீதிமன்றத்தில் முறையீடு செய்ய உள்ளதாகக் கர்நாடக அரசு அறிவித்துள்ளது.
காவிரி விவகாரத்தில், தமிழகத்திற்குத் தினமும் வினாடிக்கு 5 ஆயிரம் கன அடி வீதம் 15 நாட்களுக்குத் தண்ணீர் திறக்கவேண்டும் எனக் கர்நாடக அரசுக்குக் காவிரி மேலாண்மை ஆணையம் கடந்த 18 -ம் தேதி உத்தரவிட்டது.
இந்த உத்தரவுக்குக் கர்நாடக மாநிலத்தில் கடும் எதிர்ப்பு கிளம்பியது. இதனால், நேற்று மாநிலம் தழுவிய முழு அடைப்பு போராட்டம் நடைபெற்றது.
இதனிடையே, காவிரி மேலாண்மை ஆணையத்தின் கூட்டம் நேற்று புதுடெல்லியில் நடைபெற்றது. அப்போது, 12,500 கன அடி நீர் திறக்க உத்தரவிட வேண்டும் என்று தமிழ்நாடு அரசு தரப்பில் கோரிக்கை விடுக்கப்பட்டது. இதற்குக் கர்நாடக அதிகாரிகள் எதிர்ப்பு தெரிவித்தனர். இதனால், இரு மாநில அதிகாரிகளிடையே கடும் வாக்குவாதம் ஏற்பட்டது.
இந்த நிலையில், தமிழகத்திற்கு அக்டோபர் 15 -ம் தேதி வரை தினமும் விநாடிக்கு 3,000 கன அடி தண்ணீர் திறக்க வேண்டும் என கர்நாடக அரசுக்குக் காவிரி மேலாண்மை ஆணையம் உத்தரவு பிறப்பித்துள்ளது.
இந்த உத்தரவை எதிர்த்து, மேல் முறையீடு செய்யப்படும் எனக் கர்நாடக மாநில முதலமைச்சர் சித்தராமையா அறிவித்துள்ளார். மேலும், நதிநீர் பங்கீடு குறித்து, பொதுப்பணித்துறை, நீர்வள ஆதார அமைப்பு அதிகாரிகளுடன் அவர் அவசர ஆலோசனை நடத்தினார்.
இந்த நிலையில், தமிழகத்திற்கு உறுதியாகத் தண்ணீர் தரமுடியாது என்றும், காவிரி மேலாண்மை ஆணையம் உத்தரவை எதிர்த்து, உச்ச நீதிமன்றத்தில் முறையீடு செய்வோம் எனக் கர்நாடக மாநில முதலமைச்சர் சித்தராமையா அறிவித்துள்ளார்.
