கர்நாடக அணைகளுக்கு நீர்வரத்து அதிகரிப்பு!

கர்நாடக அணைகளுக்கு நீர்வரத்து வினாடிக்கு 17,281 கன அடியாக அதிகரித்துள்ள நிலையில், காவிரியில் 2,592 கன அடி தண்ணீர் மட்டுமே திறக்கப்பட்டு வருகிறது.

தமிழகக் காவிரி நீர்ப்பிடிப்பு பகுதிகளில் போதிய அளவில் மழை இல்லாததாலும், கர்நாடக அணைகளில் தண்ணீர் திறப்பு குறைக்கப்பட்டதாலும் மேட்டூர் அணையின் நீர்மட்டம் குறைந்து காணப்படுகிறது. மேலும், மேட்டூர் அணைக்கு வரும் நீரின் அளவைவிட பாசனத்திற்குத் திறக்கப்படும் நீரின் அளவு அதிகமாக இருப்பதால், அணையின் நீர்மட்டம் தொடர்ந்து குறைந்து வருகிறது.

நேற்று காலை மேட்டூர் அணைக்கு வரும் நீரின் அளவு 3,122 கன அடியாக இருந்தநிலையில், இன்று காலை 1,560 கன அடியாக குறைந்துள்ளது. மேலும், அணையின் நீர்மட்டமும் 36.31 அடியிலிருந்து இன்று காலை 35.38 அடியாகக் குறைந்துள்ளது. தற்போது அணையில் 9.83 டி.எம்.சி. தண்ணீர் மட்டுமே உள்ளது.

இதற்கிடையே கர்நாடகாவில் காவிரி நீர்ப்பிடிப்பு பகுதிகளில் மழை பெய்ததால், அப்பகுதியிலுள்ள அணைகளுக்கு நீர்வரத்து அதிகரித்துள்ளது. கபினி அணைக்கு இன்று காலை 8 மணி நிலவரப்படி வினாடிக்கு 5,481 கன அடி தண்ணீர் வந்து கொண்டிருக்கிறது. அணையிலிருந்து காவிரி ஆற்றில் வினாடிக்கு 1,000 கன அடி தண்ணீர் மட்டுமே வெளியேற்றப்பட்டு வருகிறது.

இதேபோல், கிருஷ்ணராஜசாகர் அணைக்கு வினாடிக்கு 11,800 கன அடி தண்ணீர் வந்து கொண்டிருக்கிறது. அணையிலிருந்து 1,592 கன அடி தண்ணீர் மட்டுமே காவிரி ஆற்றில் திறக்கப்பட்டு வருகிறது.

இந்த 2 அணைகளுக்கும் வினாடிக்கு 17,281 கன அடி தண்ணீர் வந்து கொண்டிருக்கிறது. ஆனாலும், 2 அணைகளிலிருந்து வினாடிக்கு 2,592 கன அடி தண்ணீர் மட்டுமே காவிரி ஆற்றில் வெளியேற்றப்பட்டு வருகிறது.