கோடியக்கரைக் கடற்கரை பகுதியில் வீசி வரும் சூறைக்காற்றின் காரணமாக, கடல் கடும் சீற்றத்துடன் காணப்படுகிறது.
நாகை மாவட்டம் வேதாரண்யம் அடுத்த கோடியக்கரை பகுதியில் கடந்த நாட்களாக சூறைக்காற்று வீசி வருகிறது. மேலும், கடல் சீற்றத்துடன் காணப்படுவதால், மீனவர்கள் 2-வது நாளாகக் கடலுக்கு மீன்பிடிக்கச் செல்லவில்லை. இதனால், 100-க்கும் மேற்பட்ட படகுகளைக் கரையில் பாதுகாப்பாக நிறுத்தியுள்ளனர்.
கோடியக்கரை கடற்கரை பகுதியில் வீசும் சூறைக் காற்று காரணமாக, சாலைகளின் குறுக்கேயும், கடற்கரை பகுதிகளிலும் சுமார் 5 அடி உயரம் மணல் குன்றுகளாக குவிந்து காட்சியளிக்கிறது. திடீரென்று உருவான மணல் குன்றுகளால், அப்பகுதியில் மீனவர்கள் மற்றும் வாகனங்கள் செல்ல முடியாத சூழல் ஏற்பட்டுள்ளது.மேலும், கடற்கரையில் மீனவர்கள் வைத்துள்ள மீன்பிடி வலைகள் மண்ணில் புதைந்து காணப்படுகிறது.
கோடியக்கரையில் மீன் பிடி சீசன் தொடங்கியவுடன் நாகை, கடலூர், திருவாரூர், தஞ்சை, மயிலாடுதுறை, இராமநாதபுரம், மண்டபம் உள்ளிட்ட பகுதிகளைச் சேர்ந்த ஆயிரக்கணக்கான மீனவர்கள் வந்து, மீன் பிடித்து விற்பனை செய்வர்.
ஆனால் இந்த ஆண்டு இதுவரை சீசன் தொடங்கவில்லை. இதற்குக் காரணம் தற்போது வழக்கத்துக்கு மாறாக வீசும் இந்த காற்றால் மீனவர்கள் அச்சமடைந்துள்ளனர். எனவே சீசன் காலம் தொடங்க இன்னும் இரு வாரமாகும் என மீனவர்கள் தெரிவித்தனர். இதனால் தங்களுடைய வாழ்வாதாரம் பாதிக்கப்பட்டுள்ளதாகவும் கூறினர்.
