புதுச்சேரியில் உள்ள பிரபல நகைக்கடையில், நகை சீட்டுக் கட்டியவர்களுக்கு, நகை கொடுக்காததால், பணம் கட்டியவர்கள் கடையை முற்றுகையிட்டு போராட்டத்தில் ஈடுபட்டனர்.
புதுச்சேரி காமராஜர் சாலையில் பிரபல நகைக்கடை செயல்பட்டு வருகிறது. புதுச்சேரியில் ஒரு வருடமாகச் செயல்பட்டு வரும் இந்த நகைக்கடையில், நகை சீட்டுப் போட்டால் 12 மாதத்திற்கு 9 சதவீதம் போனஸ் உள்ளிட்ட பல்வேறு சலுகைகளை அறிவித்தது. இதை அடுத்து, ஏராளமான மக்கள் நகை சீட்டில் சேர்ந்தனர்.
நகை சீட்டுக் கட்டி வந்த சிலர் அதற்குரிய காலம் முடிவடைந்ததால் நகையை வாங்கக் கடைக்குச் சென்றுள்ளனர். இன்னும் சிலர் 12 மாதத்திற்கு முன்பாகவே சீட்டை முடித்துவிட்டு நகையை வாங்க வந்தனர். ஆனால் அவர்களுக்கு நகையை வழங்காமல் கடந்த சில நாட்களாகவே கடை ஊழியர்கள் அலைக்கழித்து வந்தனர்.
இந்த நிலையில் நேற்று 50-க்கும் மேற்பட்ட வாடிக்கையாளர்கள் நகைக் கடைக்கு வந்தனர். ஆனால் கடையில் சில வெள்ளி நகைகள், வெள்ளி பொருட்கள் மட்டுமே இருந்தன.
இதனைக் கண்டு அதிர்ச்சி அடைந்த வாடிக்கையாளர்கள், நகையை உடனே தரக் கூறினர். இல்லாவிட்டால் அதற்குரிய பணத்தைத் தரவேண்டும் என்று கேட்டனர். அதற்குக் கடை ஊழியர்கள் சரியாக பதிலளிக்காததால், கடை மேலாளருடன் வாக்குவாதத்தில் ஈடுபட்டனர். இதை அடுத்து கடைக்கு எதிரே அமர்ந்து போராட்டத்தில் ஈடுபட்டனர். இதுகுறித்து தகவலறிந்து சம்பவ இடத்திற்கு வந்த பெரிய கடை காவல்துறை, போராட்டத்தில் ஈடுபட்டவர்களிடம் பேச்சுவார்த்தை நடத்தினர்.
போராட்டத்தைக் கைவிட்டு எழுத்துப்பூர்வமாகப் புகார் அளிக்குமாறு அறிவுறுத்தினர். இதனை அடுத்து வாடிக்கையாளர்கள் சிலர் காவல்நிலையத்தில் சென்று புகார் அளித்தனர்.
பின்னர் வாடிக்கையாளர்கள் சிலர் நகைக் கடையில் இருந்த வெள்ளி பொருட்களை நகை சீட்டு செலுத்திய பணத்திற்கு வாங்கி சென்றனர்.
இந்த நகை கடை திருச்சி, மதுரை, சென்னை, கும்பகோணம் உட்பட பல இடங்களில் செயல்பட்டு வருகிறது.
