மாவோயிஸ்டுகள் அச்சம்: தமிழத்தில் போலீசார் திடீர் ரோந்து – என்ன நடக்கிறது?

கேரள மாநிலம் கண்ணூர் மாவட்டம் அயன்குன்று உருப்பு குற்றி வனப்பகுதியில், மாவேயிஸ்டுகளுக்கும், தீவிரவாத தடுப்பு பிரிவு போலீசாருக்கும் இடையே கடும் துப்பாக்கிச் சண்டை நடந்தது. அப்போது, போலீசாரிடம் இருந்து தப்பிச் சென்ற மாவோயிஸ்டுகளை தேடும் பணியில், தீவிரவாத தடுப்பு பிரிவு போலீசார் அதிரடியாக ஈடுபட்டுள்ளனர்.

இது தொடர்பாக, தீவிரவாதிகள் எதிர்ப்பு படை டிஐஜி புட்ட விமாதித்ரு கூறுகையில், 8 பேர் கொண்ட மாவோயிஸ்டுகள் போலீசார் மீது துப்பாக்கிச் சூடு நடத்தினர். பதிலுக்கு போலீசார் கடும் தாக்குதல் நடத்தினர். போலீசாருக்கு பயந்து, வனப்பகுதிக்குள் தப்பிச் சென்றுள்ளனர். இதில், 2 மாவோயிஸ்டுகளுக்கு படுகாயம் ஏற்பட்டுள்ளதாகத் தகவல் கிடைத்துள்ளது. அவர்களைத் தேடிக் கண்டுபிடிக்கும் பணி தற்போது நடைபெற்று வருகிறது. மாவோயிஸ்டுகள் மீது தீவிரவாத தடுப்பு சட்டம் உள்பட பல்வேறு பிரிவுகளின் கீழ் வழக்குப் பதிவு செய்யப்பட்டுள்ளது. விரைவில் அவர்களைக் கைது செய்வோம் என்றார்.

இந்த நிலையில், தமிழகத்தில் முதுமலை வனப்பகுதியில் போலீசாரின் கண்காணிப்பு தீவிரப்படுத்தப்பட்டுள்ளது. மாவட்ட காவல் கண்காணிப்பாளர் சுந்தர வடிவேல் தலைமையில் 50 -க்கும் மேற்பட்ட தீவிரவாத தடுப்பு பிரிவு போலீசார் மற்றும் அதிவிரைவுப்படை போலீசார், முதுமலை வனப் பகுதியில் திடீர் ரோந்து பணியில் ஈடுபட்டுள்ளனர்.

குறிப்பாக, தமிழகம், கேரளா மற்றும் கர்நாடக மாநில வனப் பகுதிகள் இணையக் கூடிய TRI JUNCTION பகுதியில், துப்பாக்கி ஏந்திய தீவிரவாத தடுப்பு பிரிவு போலீசார் பன்மடங்கு குவிக்கப்பட்டுள்ளனர்.