எல்லை தாண்டி மீன்பிடித்ததாகக் கூறி இலங்கை கடற்படையால் கைது செய்யப்பட்ட தமிழக மீனவர்கள், மத்திய அரசின் தீவிர முயற்சியால் விடுதலை செய்யப்பட்ட நிலையில், இன்று சென்னை வந்தடைந்தனர்.
தமிழக மீனவர்கள் எல்லை தாண்டி வந்து மீன் பிடிப்பதாகக் கூறி இலங்கை கடற்படையினர் சிறை பிடித்துச் செல்வதும், அவர்களின் விசைப்படகுகளைப் பறிமுதல் செய்வதும் வழக்கமான ஒன்றாகி விட்டது.
கடந்த 14-ஆம் தேதி இராமேஸ்வரம் மீனவர்கள் 15 பேர் மீன்பிடிப்பதற்காக கடலுக்குச் சென்றனர். அவர்கள் எல்லைத் தாண்டி மீன்பிடித்ததாகக் கூறி, இலங்கை கடற்படையினரால் கைது செய்யப்பட்டனர். மேலும், இரண்டு விசைப் படகுகளையும் பறிமுதல் செய்தனர்.
கைது செய்யப்பட்ட 15 மீனவர்களும் இந்திய கடல் எல்லையில் மீன் பிடித்துக் கொண்டிருந்ததாகவும், இலங்கை கடல் எல்லைக்குள் அவர்கள் செல்லவில்லை என்றும், இந்திய எல்லைக்குள் அத்துமீறி இலங்கை கடற்படையினர்தான் நுழைந்தனர் என்றும் தமிழக மீனவர்கள் தகவல் அனுப்பினர்.
இதனை அடுத்து தமிழக மீனவர்களை மீட்க பிரதமர் மோடி தலைமையிலான மத்திய அரசு தீவிர முயற்சிகளை மேற்கொண்டது. மத்திய அரசு மேற்கொண்ட முயற்சியால், 15 தமிழக மீனவர்களும் விடுதலை செய்யப்பட்டனர்.
விடுவிக்கப்பட்ட தமிழக மீனவர்கள் 15 பேரும், இலங்கையிலிருந்து இன்று காலை சென்னை விமான நிலையம் வந்தடைந்தனர். அவர்கள் சென்னையிலிருந்து இராமேஸ்வரம் செல்கின்றனர்.
மீனவர்களை மீட்க தீவிர முயற்சி மேற்கொண்ட, பாரத பிரதமர் நரேந்திர மோடி தலைமையிலான மத்திய அரசுக்கு மீனவர்கள் கண்ணீர் மல்க நன்றி தெரிவித்துள்ளனர்.
