தேனி மாவட்டம் ஆண்டிப்பட்டி அருகே உள்ள வைகை அணையிலிருந்து பாசனத்திற்காக 2 ஆயிரம் கன அடி தண்ணீர் திறக்கப்பட்டுள்ளது. இதனால் கரையோரப் பகுதிகளில் வசிக்கும் மக்களுக்கு வெள்ள அபாய எச்சரிக்கை விடப்பட்டுள்ளது.
தமிழகத்தில் வடகிழக்கு பருவமழை தீவிரமடைந்துள்ளது. தேனி மாவட்டத்தில் கடந்த சில வாரங்களாக கனமழை பெய்து வருகிறது.
ஆண்டிப்பட்டி அருகே அமைந்துள்ள வைகை அணையின் நீர்ப்பிடிப்பு பகுதிகளிலும் கனமழை பெய்தது. இதனால், 71 அடி உயரம் கொண்ட அணையின் நீர்மட்டம் 70 அடியை எட்டியுள்ளது.
இதனை அடுத்து மதுரை, திண்டுக்கல் மாவட்டங்களில் விவசாய பாசனத்திற்காக அணையில் இருந்து பாசன கால்வாயில் தண்ணீர் திறக்கப்பட்டது.
இந்த நிலையில், சிவகங்கை மாவட்ட 2-ஆம் பூர்வீக பாசனத்திற்காக, 7 முழு சிறிய மதகுகள் வழியாக, இன்று வினாடிக்கு 2 ஆயிரம் கனஅடி தண்ணீர் திறந்து விடப்பட்டுள்ளது.
அணையிலிருந்து தண்ணீர் திறக்கப்பட்டுள்ளதால், தேனி, மதுரை, திண்டுக்கல், சிவகங்கை மாவட்ட கரையோரப் பகுதிகளில் மக்களுக்கு வெள்ள அபாய எச்சரிக்கை விடுக்கப்பட்டுள்ளது.
இன்று முதல் வருகிற 5-ஆம் தேதி வரையிலான 5 நாட்களுக்கு ஆற்றில் தண்ணீர் திறக்கப்பட உள்ளது. முதல் 2 நாட்களுக்கு வினாடிக்கு 2 ஆயிரம் கனஅடியும், 3-ஆம் நாள் வினாடிக்கு ஆயிரத்து 500 கனஅடியும், 4-வது நாளில் வினாடிக்கு ஆயிரம் கனஅடியும், 5-வது நாளில் வினாடிக்கு 665 கனஅடியும் திறக்கப்பட உள்ளது. இந்த 5 நாட்களில் வைகை அணையில் இருந்து 619 மில்லியன் கனஅடி தண்ணீர் திறக்கப்பட உள்ளது.
