ஜூனியர் பெண்கள் உலகக் கோப்பை ஹாக்கி முடிவுகள்!

ஜூனியர் பெண்கள் உலகக் கோப்பை ஹாக்கி போட்டியில் பெல்ஜியம் அணி 3-2 என்ற கோல் கணக்கில் இந்தியாவை வீழ்த்தியது.

சிலி தலைநகர் சான்டியாகோவில் 10-வது ஜூனியர் பெண்கள் உலகக் கோப்பை ஹாக்கி போட்டி நடைபெற்று வருகிறது.

இதில் பங்கேற்றுள்ள 16 அணிகள் 4 பிரிவாக பிரிக்கப்பட்டு லீக் சுற்றில் விளையாடி வருகிறது. லீக் சுற்று முடிவில் ஒவ்வொரு பிரிவிலும் டாப் 2 இடங்களை பிடிக்கும் அணிகள் கால் இறுதிக்குள் நுழையும்.

இதில் ‘சி’ பிரிவில் இடம் பிடித்துள்ள இந்திய அணி நேற்று நடந்த தனது 3 வது மற்றும் கடைசி லீக் ஆட்டத்தில் பெல்ஜியத்துடன் விளையாடியது.

விறுவிறுப்பாக நடைபெற்ற இந்தப் போட்டியில் பெல்ஜியம் வீராங்கனைகள் ஸ்குருஸ் நோவ் 5-வது நிமிடத்திலும், டிமோட் பிரேன்ஸ் 42-வது நிமிடத்திலும் கோலடித்து 2-0 என்ற கணக்கில் முன்னிலையை பெற்றனர்.

இந்திய வீராங்கனை அன்னு 47 வது நிமிடத்தில் பெனால்டி கார்னர் வாய்ப்பிலும், 51 வது நிமிடத்தில் பெனால்டி ஸ்டிரோக் வாய்ப்பிலும் கோலடித்து 2-2 என்ற கணக்கில் சமநிலையை ஏற்படுத்தினர்.

52-வது நிமிடத்தில் பெல்ஜியம் வீராங்கனை பொனாமி அஸ்ட்ரிட் பெனால்டி ஸ்டிரோக் வாய்ப்பை கோலாக்கினார். அதன் பிறகு இரு அணிகளும் கோல் அடிக்க எடுத்த முயற்சிக்கு பலன் கிட்டவில்லை.

முடிவில் பெல்ஜியம் அணி 3-2 என்ற கோல் கணக்கில் இந்தியாவை வீழ்த்தி தொடர்ச்சியாக 3-வது வெற்றியை பெற்று தனது பிரிவில் முதலிடத்தை சொந்தமாக்கி காலிறுதிக்கு முன்னேறியது.

இதேபிரிவில் நடந்த மற்றொரு லீக் ஆட்டத்தில் ஜெர்மனி அணி 8-0 என்ற கோல் கணக்கில் கனடாவை வீழ்த்தி 2 வது வெற்றியை பெற்றதுடன் தனது பிரிவில் 2-வது இடம் பெற்று கால்இறுதிக்குள் நுழைந்தது.

இந்திய அணி ஒரு வெற்றி, 2 தோல்வியுடன் 3-வது இடமும், கனடா 3 தோல்வியுடன் கடைசி இடமும் பெற்று காலிறுதி வாய்ப்பை இழந்தன.