டி20: இந்தியா – தென்னாப்பிரிக்கா இன்று மோதல்!

இந்தியா – தென்னாப்பிரிக்கா அணிகளுக்கு இடையிலான முதல் டி-20 கிரிக்கெட் தொடர் டர்பன் நகரில் இன்று இரவு 7.30 மணிக்கு நடைபெறுகிறது.

ஆஸ்திரேலியாவுக்கு எதிரான டி20 தொடரை 4-1 என்ற கணக்கில் இந்திய அணி கைப்பற்றியது. அடுத்ததாக, தென்னாப்பிரிக்காவுக்கு சுற்றுப்பயணம் மேற்கொண்டுள்ள இந்திய அணி, மூன்று டி20, மூன்று ஒரு நாள் மற்றும் இரண்டு டெஸ்ட் போட்டிகள் கொண்ட தொடரில் விளையாட உள்ளது.

இதில், இந்தியா – தென்னாப்பிரிக்கா அணிகள் இடையிலான, முதலாவது டி20 போட்டி தென்னாப்பிரிக்க நாட்டின் டர்பன் நகரில் உள்ள கிங்ஸ்மேட் மைதானத்தில், இன்று இரவு 7.30 மணிக்கு தொடங்குகிறது.

இதில், சீனியர் வீரர்களான விராட்கோலி, ஜஸ்பிரித் பும்ரா, கேப்டன் ரோகித் ஷர்மா ஆகியோருக்கு ஓய்வு அளிக்கப்பட்டுள்ளது. கணுக்கால் காயத்தில் இருந்து மீளாததால் 20 ஓவர் போட்டி அணியின் கேப்டன் ஹர்திக் பாண்ட்யா விலகி விட்டார்.

இதனால், கடந்த சில வாரங்களுக்கு முன் நடந்த ஆஸ்திரேலியாவுக்கு எதிரான 20 ஓவர் தொடருக்கு, கேப்டனாக இருந்த சூர்யகுமார் யாதவ் தலைமையில் இந்திய அணி களம் காண உள்ளது.
பேட்டிங் மற்றும் வேகப்பந்து வீச்சுக்கு சாதகமான டர்பன் நகரில் உள்ள மைதானம், இந்திய அணிக்கு சவாலாக இருந்தாலும், சமீபத்தில் நடந்த ஆஸ்திரேலியாவுக்கு எதிரான 20 ஓவர் தொடரை வென்ற இந்திய அணி வெற்றியுடன் தொடரைத் தொடங்க தீவிரம் காட்டும். அதேநேரத்தில் உள்ளூர் சூழலை சாதகமாக பயன்படுத்தி ஆதிக்கம் செலுத்த தென்னாப்பிரிக்க அணி முயற்சி செய்யும். எனவே, இந்த போட்டியில் விறுவிறுப்புக்கு பஞ்சம் இருக்காது.

இந்த இரு அணிகளும் சர்வதேச 20 ஓவர் போட்டியில் இதுவரை, 24 முறை நேருக்கு நேர் விளையாடி உள்ளன. இதில், 13 போட்டிகளில் இந்திய அணியும், 10 போட்டிகளில் தென்னாப்பிரிக்க அணியும் வெற்றி பெற்றுள்ளன. மேலும், ஒரு ஆட்டம் முடிவு இல்லாமல் போனது.

சூர்யகுமார் யாதவ் தலைமையிலான இந்திய அணியில் (உத்தேச பட்டியல்), யாஷஸ்வி ஜெய்ஸ்வால், சுப்மன் கில் அல்லது ருதுராஜ் கெய்க்வாட், ஸ்ரேயாஸ் அய்யர், ரிங்கு சிங், ஜிதேஷ் ஷர்மா, ரவீந்திர ஜடேஜா, ரவி பிஷ்னோய் அல்லது குல்தீப் யாதவ், முகமது சிராஜ், முகேஷ் குமார், அர்ஷ்தீப் சிங்.

மார்க்ரம் தலைமையிலான தென்னாப்பிரிக்க அணியில் (உத்தேச பட்டியல்), ரீஜா ஹென்ரிக்ஸ், மேத்யூ பிரீட்கே, ஹென்ரிச் கிளாசென் அல்லது டிரிஸ்டான் ஸ்டப்ஸ், டேவிட் மில்லர், டோனோவான் பெரீரா, மார்கோ யான்சென் அல்லது பெலுக்வாயோ, கேஷவ் மகராஜ், ஜெரால்டு கோட்ஜி, நன்ரே பர்கர், தப்ரைஸ் ஷம்சி.