சுவை மிகுந்த உணவுகள் கொண்ட நாடுகள் பட்டியலில், இந்தியா 11-வது இடத்தில் உள்ளதாக டேஸ்ட் அட்லஸ் இணையதளம் நடத்திய ஆய்வில் தெரியவந்துள்ளது. மேலும், சிறந்த உணவு பொருட்களில் இந்தியாவின் 4 உணவுகள் இடம்பிடித்துள்ளன.
உலகம் முழுவதும் உள்ள சிறந்த உணவு வகைகள், சிறந்த உணவு நகரங்கள், சிறந்த உணவு பொருட்கள், உணவுக்கு தேவையான சிறந்த பொருட்கள் போன்ற பல பிரிவுகளில் டேஸ்ட் அட்லஸ் என்ற இணையதளம் ஆய்வு செய்தது. தற்போது அதற்கான பட்டியலை டேஸ்ட் அட்லஸ் என்ற இணையதளம் வெளியிட்டுள்ளது.
அதில், மொத்தம் 3 இலட்சத்து 95 ஆயிரத்து 205 உணவுகளில் 2 இலட்சத்து 71 ஆயிரத்து 819 உணவுகள் தேர்ந்தெடுக்கப்பட்டன. அதேபோல், 1 இலட்சத்து 15 ஆயிரம் 660 உணவு பொருட்களில் 80 ஆயிரத்து 863 தேர்வு செய்யப்பட்டன.
அதில், சுவைமிக்க உணவுகளைக் கொண்ட 100 நாடுகளில், முதல் இடத்தில் இத்தாலியும், இரண்டாவது இடத்தில் ஜப்பானும், 11-வது இடத்தில் இந்தியாவும் உள்ளது. அதேபோல், உலகின் சிறந்த 100 டிஷ்களுக்கான பட்டியலில், முதல் இடத்தில் பிகன்ஹா உள்ளது.
இந்தியாவின் 4 உணவு வகைகள் இடம் பிடித்துள்ளன. அந்த பட்டியலில் 7-வது இடத்தில் பட்டர் கார்லிக் நானும், 43-வது இடத்தில் முர்க் மக்கானியும், 47-வது இடத்தில் டிக்கா-வும், 48-வது இடத்தில் தந்தூரியும் இடம் பிடித்துள்ளது.
