சமையல் எரிவாயு இணைப்புடன் கைரேகை பதிவு செய்வது கட்டாயமாக்கப்பட்டுள்ளது. தமிழகத்தில் இதற்கான பணிகள் விறுவிறுப்புடன் நடைபெற்று வருகிறது.
நாடு முழுவதும் உஜ்வாலா திட்டத்தின் கீழ் இலவச சமையல் சிலிண்டர்களை மத்திய அரசு வழங்கி வருகிறது. அத்துடன், மற்ற கேஸ் இணைப்புகளுக்கும் மத்திய அரசு மானியம் அளித்து வருகிறது.
இதில் பல்வேறு முறைகேடுகள் நடைபெறுவதாக புகார் எழுந்தது. இந்த நிலையில், முறைகேடுகளை தடுக்கும் வகையில் கேஸ் இணைப்புடன் ஆதார் எண் மற்றும் கைரேகையை பதிவு செய்வதை மத்திய அரசு கட்டாயமாக்கி உள்ளது.
அதன்படி, தமிழகம் முழுவதும் கேஸ் ஏஜென்சிகளில் மக்கள் வரிசையில் நின்று ஆதார் எண், கைரேகையை பதிவு செய்து வருகின்றனர்.
ஒரு ஆண்டுக்கு ஒரு குடும்பத்திற்கு 12 சிலிண்டர்களுக்கு மத்திய அரசு மானியம் வழங்கி வருகிறது. ஆனால், ஒருவரே பல்வேறு கேஸ் நிறுவனங்களில் பல இணைப்புகள் வைத்திருப்பதாகவும், இதனால், பலர் முறைகேடாக மானியம் பெறுவதாகவும், இதனை தடுக்கும் வகையிலே இந்த புதிய முறை நடைமுறைப்படுத்தி உள்ளதாகவும், ஆயில் நிறுவனங்கள் தெரிவித்துள்ளன.
கேஸ் சிலிண்டர் இணைப்புடன் ஆதார் எண்ணை இணைக்கும்போது ஒருவருக்கு எத்தனை கேஸ் இணைப்புகள் உள்ளன என்பது தெரியவரும். அவ்வாறு, ஒன்றுக்கு மேற்பட்ட இணைப்பு வைத்திருப்பவர்களுக்கு மானியம் ரத்து செய்யப்படும் என தகவல் வெளியாகியுள்ளது.
