கடந்த 9 ஆண்டுகளில் நாடு முழுவதும் 75 புதிய விமான நிலையங்கள் திறக்கப்பட்டிருப்பதாகவும், 2030-ம் ஆண்டுக்குள் இந்தியாவில் உள்ள விமான நிலையங்களின் எண்ணிக்கை 300 ஆக உயரும் என்றும் மத்திய அமைச்சர் ஜோதிராதித்யா சிந்தியா கூறியிருக்கிறார்.
இதுகுறித்து மத்திய சிவில் விமான போக்குவரத்துத்துறை அமைச்சர் ஜோதிராதித்யா சிந்தியா கூறுகையில், “உத்தரப் பிரதேச மாநிலத்தில் முன்பு 6 விமான நிலையங்கள் மட்டுமே இருந்தன. தற்போது 9 விமான நிலையங்கள் உள்ளன. நாளை 10-வது விமான நிலையம் தொடங்கப்பட இருக்கிறது.
அடுத்த ஆண்டு மேலும் 9 விமான நிலையங்கள் அமைக்கப்படும். இதன் மூலம் உத்தரப் பிரதேச மாநிலத்தில் உள்ள விமான நிலையங்களின் எண்ணிக்கை 19 ஆக உயரும். அதேபோல, 2 மாதங்களுக்குப் பிறகு அஜாம்கார், அலிகார், மொராதாபாத், ஷ்ரவஸ்தி, சத்ரகூட் ஆகிய இடங்களில் தலா 1 என 5 விமான நிலையங்கள் திறக்கப்படும்.
பாரதப் பிரதமராக நரேந்திர மோடி பதவியேற்றதில் இருந்து, கடந்த 9 ஆண்டுகளில் நாடு முழுவதும் 75 புதிய விமான நிலையங்கள் திறக்கப்பட்டுள்ளன. 2030-ம் ஆண்டுக்குள் இந்தியாவிலுள்ள விமான நிலையங்களின் எண்ணிக்கை 300 ஆக இருக்கும்” என்றார்.
