2024-ஆம் ஆண்டில் மேலும் 3 இராணுவ உளவு செயற்கைக்கோள்களை விண்ணில் செலுத்த உள்ளதாக வடகொரிய அதிபர் கிம்ஜாங் உன் கூறியுள்ளார்.
வடகொரியாவைப் பொறுத்தவரை, உலகில் மர்மமான நாடாகக் கருதப்படுகிறது. ஏனெனில், அந்நாட்டில் என்ன நடக்கிறது என்பதே மற்றவர்களுக்குத் தெரியாது. மேலும், அந்நாட்டில் கடுமையான மற்றும் வித்தியாசமான சட்ட விதிகள் கையாளப்படுகிறது.
எல்லாவற்றுக்கும் மேலாக, அந்நாட்டை அதிபர் கிம் ஜாங் உன் சர்வாதிகாரி போல ஆட்சி செய்து வருகிறார்.
இந்நாடு கொரிய தீபகற்ப பகுதியில் அணு ஆயுத மற்றும் ஏவுகணை சோதனைகள் மூலம் பதற்றத்தை ஏற்படுத்தி வருகிறது. இதற்கு சர்வதேச நாடுகள் பலவும் எதிர்ப்பு தெரிவித்த போதிலும், அமெரிக்கா, தென்கொரியா இணைந்து பல்வேறு தடைகளை விதித்த போதிலும், வடகொரியா அதைக் கண்டுக் கொள்ளாமல், தொடர்ந்து, ஏவுகணை சோதனைகளை மேற்கொண்டு வருகிறது. இதனால் கொரிய தீபகற்பத்தில் போர் பதற்றம் நீடிக்கிறது.
இந்நிலையில், வடகொரியா அதிபர் கிம்ஜாங் உன் கூறுகையில், 2024-ஆம் ஆண்டில் மேலும் 3 இராணுவ உளவு செயற்கைக்கோள்களை விண்ணில் செலுத்த உள்ளோம். மேலும், அணு ஆயுதங்கள், நவீன ஆளில்லா போர் உபகரணங்களை உருவாக்குவோம்.
போர் பதிலடி திறன்களைப் பெறுவதற்கான பணிகளை மேம்படுத்த வேண்டும். எதிரிகளின் எந்த வகையான தாக்குதல் செயல்களையும் எதிர்பார்ப்பதற்கு முழுமையான மற்றும் சரியான இராணுவ தயார் நிலையைப் பெறவேண்டும் என்று கூறினார்.
