ஜம்மு காஷ்மீரில் 2023-ம் ஆண்டில் மட்டும் 55 வெளிநாட்டு தீவிரவாதிகள் உட்பட 76 தீவிரவாதிகள் பாதுகாப்புப் படையினரால் சுட்டுக் கொல்லப்பட்டிருப்பதாக ஜம்மு காஷ்மீா் மாநில டி.ஜி.பி. ஆர்.ஆர்.ஸ்வைன் தெரிவித்திருக்கிறார்.
இதுகுறித்து ஜம்மு காஷ்மீா் மாநில டி.ஜி.பி. ஆர்.ஆர்.ஸ்வைன் செய்தியாளா்களுக்கு அளித்த பேட்டியில், “ஜம்மு காஷ்மீரில் பாதுகாப்புப் படையினர் மேற்கொண்ட தீவிர நடவடிக்கைகள் மூலம் 2023-ம் ஆண்டு மட்டும் 55 வெளிநாட்டு தீவிரவாதிகள் உட்பட 76 தீவிரவாதிகள் சுட்டுக் கொல்லப்பட்டிருக்கிறார்கள்.
மேலும், 291 தீவிரவாதிகள் கைது செய்யப்பட்டிருப்பதோடு, அவர்களுக்குத் துணைபுரிந்ததாக 201 பேர் மீது பொது பாதுகாப்புச் சட்டத்தின் கீழ் வழக்குப் பதிவு செய்யப்பட்டிருக்கிறது. அதேபோல, 2023-ம் ஆண்டு நடத்தப்பட்ட தீவிரவாதத் தாக்குதல்களில் 14 பொதுமக்கள்,மாநில காவல்துறை டி.எஸ்.பி., இன்ஸ்பெக்டர், 4 போலீஸார் ஆகியோர் உயிரிழந்திருக்கிறார்கள்.
அதேசமயம், கடந்த ஆண்டுடன் ஒப்பிடும்போது, தீவிரவாத நடவடிக்கைகள் 63 சதவீதம் அளவுக்கு குறைந்திருக்கிறது. மேலும், தீவிரவாத அமைப்புகளுக்கு ஆள்சேர்ப்பு நடவடிக்கைகளும், பாதுகாப்புப் படையினர் மீது கல்வீசி தாக்குதல் நடத்தும் சம்பவங்களும் முன்னெப்போதும் இல்லாத அளவில் குறைந்திருக்கின்றன.
இது தவிர, இந்த ஆண்டில் 89 தீவிரவாத முயற்சிகள் முறியடிக்கப்பட்டதோடு, தீவிரவாதிகளின் 18 மறைவிடங்கள் கண்டுபிடிக்கப்பட்டு அழிக்கப்பட்டன. அதோடு, தீவிரவாத செயல்களில் ஈடுபட்டவர்களின் 170 கோடி ரூபாய் மதிப்பிலான நிலம், வீடு உள்ளிட்ட 99 சொத்துகள் பறிமுதல் செய்யப்பட்டதோடு, அவர்களின் 68 வங்கிக் கணக்குகளும் முடக்கப்பட்டன.
எல்லாவற்றுக்கும் மேலாக, பிரிவினைவாதம் மற்றும் தீவிரவாதத்தை ஊக்குவிக்கும் வகையிலான பதிவுகளை வெளியிட்ட 8,000 போலி சமூக ஊடக கணக்குகள் அடையாளம் காணப்பட்டு நடவடிக்கைகள் எடுக்கப்பட்டிருக்கின்றன” என்றார்.
