பாரதப் பிரதமர் நரேந்திர மோடி நிர்வாகத்தின் கீழ், இந்திய பொருளாதாரம், வெளியுறவுக் கொள்கை ஆகிய துறைகள் வேகமான வளர்ச்சி கண்டு வருகிறது என்று சீன நாளிதழ் பாராட்டி கட்டுரை வெளியிட்டிருக்கிறது.
சீனாவின் அரசு நாளிதழான “குளோபல் டைம்ஸ்” பத்திரிகையில், பியூடான் பல்கலைக்கழகத்தின் தெற்காசிய ஆய்வு மைய இயக்குநர் சாங் ஜியோடாங், இந்தியாவின் அரசியல், பொருளாதார மாற்றம் குறித்து கட்டுரை ஒன்றை எழுதி இருக்கிறார்.
அக்கட்டுரையில், கடந்த 10 ஆண்டுகளில் இந்தியா உலக அரங்கில் அடைந்த முக்கியத்துவம் குறித்தும், அரசியல் ரீதியாகவும், கலாச்சார ரீதியாகவும் இந்தியா தனக்கான சொந்த அடையாளத்தை உருவாக்கி வருவது குறித்தும் குறிப்பிட்டிருக்கும் சாங் ஜியோடாங், மோடியின் நிர்வாகத்தை வெகுவாக பாராட்டி இருக்கிறார்.
அக்கட்டுரையில் சாங் ஜியோடாங் கூறுகையில், “பாரதப் பிரதமர் மோடியின் ஆட்சியின் கீழ் இந்தியாவின் பொருளாதாரம், சமூகம் மற்றும் வெளிநாட்டு கொள்கைகளில் குறிப்பிடத்தக்க மாற்றங்கள் நிகழ்ந்திருக்கின்றன. இந்தியா மிகுந்த தன்னம்பிக்கையுடனும், திட்டமிடலுடனும் உலக அரங்கில் வலம் வரத் தொடங்கி இருக்கிறது.
குறிப்பாக, கடந்த 4 ஆண்டுகளில் முக்கியமான மாற்றங்கள் நிகழ்ந்திருக்கின்றன. பாரத் கதையாடல் உருவாக்கப்பட்டிருக்கிறது. பொருளாதாரம் நல்ல வளர்ச்சி அடைந்திருக்கிறது. நகர்ப்புற கட்டமைப்பு மேம்பட்டிருக்கிறது. உலக நாடுகளுடனான உறவில் சரிசமமான இடத்தை இந்தியா அடைந்து வருகிறது.
சீனா – இந்தியா இடையிலான வர்த்தக உறவில் இந்தியாவின் அணுகுமுறை மாறி இருக்கிறது. முதலில், சீனாவின் இறக்குமதியை குறைப்பதில் இந்தியா கவனம் செலுத்தியது. தற்போது, தனது ஏற்றுமதியை அதிகரிப்பதில் கவனம் செலுத்துகிறது.
அரசியல் மற்றும் கலாச்சார தளத்தில் மேற்கத்திய நாடுகளின் தாக்கத்திலிருந்து விலகி, இந்தியா தனது சொந்த அடையாளத்தை நோக்கி நகரந்திருக்கிறது. அதாவது, இந்தியா காலனிய பாதிப்பிலிருந்து விடுபட்டு, சொந்த அடையாளத்தை வலுப்படுத்தி வருகிறது.
சர்வதேச உறவுகளிலும் இந்தியா மிகுந்த திட்டமிடலுடன் செயல்படுகிறது. அமெரிக்கா, ஜப்பான், ரஷ்யா ஆகிய பல்வேறு சர்வதேச தரப்புகளுடன் நல்ல உறவை பராமரித்து வருகிறது.
கடந்த 10 ஆண்டுகளில் வலுவான, உறுதிமிக்க தரப்பாக மாறி இருக்கும் இந்தியா, உலக அரங்கில் முக்கிய சக்தியாக உருவெடுத்திருக்கிறது. சர்வதேச உறவில் குறுகியகால கட்டத்தில் இத்தகைய மாற்றம் மிக அரிதானது” என்று தெரிவித்திருக்கிறார்.
