அனுமன் ஜெயந்தியை முன்னிட்டு சென்னை நங்கநல்லூரில் உள்ள ஆஞ்சநேயர் கோவிலில் ஆளுநர் ஆர்.என்.ரவி தரிசனம் செய்தார்.
தமிழகம் முழுவதும் அனுமன் ஜெயந்தி விழா கோலாகலமாக கொண்டாடப்பட்டு வருகிறது. நாமக்கல் ஆஞ்சநேயர் கோவிலில் ஆஞ்சநேயருக்கு 1 லட்சத்து 8 வடைகள் கொண்ட மாலை அணிவிக்கப்பட்டு சிறப்பு ஆராதனைகள் நடைபெற்றன.
இதேபோல் திருவாரூர் மாவட்டம் திருவோணமங்கலம் ஞானபுரி சங்கடஹர ஸ்ரீ மங்கள மாருதி ஆஞ்சநேயர் கோயிலில் சிறப்பு பூஜை நடைபெற்றது. இதில் திரளான பக்தர்கள் கலந்துகொண்டு விஸ்வரூப ஆஞ்சநேயரை தரிசனம் செய்தனர்.
இந்நிலையில், சென்னை நங்கநல்லூரில் உள்ள ஆஞ்சநேயர் கோவிலில் தமிழக ஆளுநர் ஆர்.என்.ரவி தனது மனைவியுடன் சாமி தரிசனம் செய்தார். இதுதொடர்பாக ஆளுநர் மாளிகை எக்ஸ் தளத்தில் பதிவு ஒன்றை வெளியிட்டுள்ளது.
அதில், கவர்னர் ஆர்.என்.ரவி, அவரது மனைவி லட்சுமி ரவி ஆகிய இருவரும் ஆஞ்சநேயர் ஜெயந்தியை முன்னிட்டு சென்னை நங்கநல்லூர் ஆஞ்சநேயர் சுவாமி கோவிலில் ஸ்ரீ ஆஞ்சநேயரை வணங்கி, மக்கள் நல்ல ஆரோக்கியம் மற்றும் நல்வாழ்வு பெறவும், நமது மாநிலம் மற்றும் தேசம் அமைதியும் வளமும் பெறவும் பிரார்த்தனை செய்தனர் என்று தெரிவிக்கப்பட்டுள்ளது.
