வரும் ஏப்ரல் 8-ஆம் தேதி சூரிய கிரகணம் நிகழும் போது, அது நயாகரா நீர்வீழ்ச்சியில் பிரதிப்பலிக்கும். இதனைக் காண லட்சக்கணக்கான மக்கள் வருவார்கள் என்பதால், நயாகராவில் அவசர நிலை அறிவிக்கப்பட்டுள்ளது.
ஏப்ரல் 8-ஆம் தேதி சூரிய கிரகணம் நிகழவுள்ளது. இந்த வானியல் அதிசயம் வட அமெரிக்கா முழுவதும் தெரியும் என்று கூறப்படுகிறது. பூமிக்கும் சூரியனுக்கும் இடையில் சந்திரன் செல்லும்போது, சூரிய கிரகணம் ஏற்படும்.
இந்த நிலையில், வட அமெரிக்காவில் சூரிய கிரகணம் நிகழவுள்ளதால், நயாகராவில் அவசரநிலை அறிவிக்கப்பட்டுள்ளது. கடந்த 1979-ஆம் ஆண்டுக்கு பிறகு, நயாகராவில் சூரிய கிரகணம் தென்படவுள்ளதால், லட்சக்கணக்கான மக்கள் அங்கு கூடுவார்கள் என்று எதிர்பார்க்கப்படுகிறது.
நயாகரா நீர்வீழ்ச்சியில், சூரிய கிரகணம் பிரதிப்பலிக்கும். இந்த நிகழ்வைக் காண லட்சக்கணக்கான பொதுமக்கள் அங்கு கூட வாய்ப்புள்ள நிலையில், அவசர நிலை அறிவித்துள்ளதாக நயாகரா பிராந்தியத் தலைவர் ஜிம் பிராட்லி தெரிவித்துள்ளார்.
இணைய சேவை, போக்குவரத்து நெரிசல் உள்ளிட்ட பிரச்சினைகளுக்கு உடனுக்குடன் தீர்வு காணும் வகையில், ஏற்பாடுகள் செய்யப்பட்டுள்ளன. சூரிய கிரகணம் நிகழ்வதற்கு முன்பு, பொதுமக்கள் தங்களுக்கு தேவையான அத்தியாவசிய பொருட்களை இருப்பு வைத்துக்கொள்ளுமாறு அறிவுறுத்தப்பட்டுள்ளனர். மேலும், சாலை விதிகளை பின்பற்றவும், சூரிய கிரகணத்தை சாலையில் நின்று புகைப்படங்கள் எடுக்க வேண்டாம் என்றும் அறிவுறுத்தப்பட்டுள்ளனர்.
சூரிய கிரகணத்தை முன்னிட்டு, நயாகராவிலுள்ள பள்ளிகளுக்கு விடுமுறை அளிக்கப்பட்டுள்ளது. சூரிய கிரகணத்தை நேரடியாக பார்ப்பதை தவிர்த்து, பாதுகாப்பான கண்ணாடிகளை பயன்படுத்தி, பார்க்குமாறு பொதுமக்களுக்கு அந்நாட்டு அரசாங்கம் அறிவுறுத்தி உள்ளது.
