அரச குடும்பத்துடனான உறவை மீட்டெடுக்க பிரிட்டன் இளவரசர் ஹாரி முயற்சி செய்து வருவதாக தகவல்கள் வெளியாகியுள்ளன. தனது பழைய நண்பர்கள் மற்றும் முன்னாள் ஆலோசகர்களின் மூலம் இது நடக்கலாம் என்று இளவரசர் ஹாரி எதிர்பார்ப்பதாக கூறப்படுகிறது. அது பற்றிய ஒரு செய்தி தொகுப்பு.
பிரிட்டன் அரச குடும்பத்தைச் சேர்ந்த இளவரசர் வில்லியம் ஹாரியும், கடந்த 2018 ஆம் ஆண்டு அமெரிக்க நடிகை மேகன் மார்க்கல்வும் காதலித்து திருமணம் செய்து கொண்டனர். இதனைத் தொடர்ந்து அரச குடும்பத்தினருக்கும், ஹாரி- மேகன் தம்பதியருக்கும் இடையே அடிக்கடி கருத்துவேறுபாடுகள் ஏற்பட்டன.
2020ம் ஆண்டு தொடக்கத்தில் அரச குடும்பத்தின் மூத்த உறுப்பினர் பொறுப்பிலிருந்து விலகுவதாக இளவரசர் ஹாரி, மேகன் மார்க்கல் ஆகியோர் அறிவித்தனர். பிறகு அமெரிக்காவில் குடியேறி விட்டனர்.
அரச குடும்பத்தினரின் தொடர் பேச்சுவார்தைகளுக்குப் பின் 2021 ஆம் ஆண்டு பிப்ரவரி மாதம் இளவரசர் ஹாரி, மேகன் மார்க்கல் ஆகிய இருவரும் பிரிட்டன் அரச குடும்ப உறுப்பினர்களுக்கான அனைத்து பொறுப்புகளிலிருந்து நிரந்தரமாக விடுவிக்கப்படுவதாக பிரிட்டிஷ் மகாராணி எலிசபெத் அறிவித்திருந்தார்.
இந்த ஆண்டின் தொடக்கத்தில், ஹாரி தனது பிரிட்டிஷ் வசிப்பிடத்தைத் துறந்து, அமெரிக்காவை தனது அதிகாரபூர்வமான இடமாக அறிவித்திருந்த நிலையில்,கடந்த ஆண்டு, இளவரசர் ஹாரியும், மேகனும் பிரிட்டனில் உள்ள அதிகாரப்பூர்வ ஃபிராக்மோர் அரண்மனையை காலி செய்தனர்.
கடந்த ஜூலை மாதம் ஹாரிக்கும், மேகன் மார்க்கலுக்கும் இடையேயான உறவில் விரிசல் விழத் தொடங்கியதாக செய்திகள் வெளிவந்தன. இதனை உறுதி செய்யும் வகையில், திட்டமிட்டபடி தனது வாழ்க்கை அமையவில்லை என்ற மேகன் கருதுவதாகவும், அதனால் ஹாரிக்கும் மேகனுக்கும் இடையே ஒரு குறிப்பிடத்தக்க பிளவு ஏற்பட்டு விட்டதாகவும் ராயல் எழுத்தாளர் டாம் க்வின் தெரிவித்திருந்தார்.
ஆரம்பத்தில் ஹாலிவுட்டால் ஏற்றுக்கொள்ளப்பட்ட மேகனின் புகழ் திருமணத்துக்குப் பின் சரிவைக் கண்டதும் Netflix உடனான ஹாரி- மேகன் ஒப்பந்தம் சிக்கலில் முடிந்ததும், பெரும் மனஅழுத்தத்தை இருவருக்கும் ஏற்படுத்தியதாக தகவல்கள் கூறுகின்றன.
மேலும், மேகன் முன்னெடுத்த வணிக முயற்சியான லைஃப்ஸ்டைல் பிராண்டான அமெரிக்கன் ரிவியரா ஆர்ச்சர்ட் சந்தையில் வெற்றி பெறமுடியாமல் திணறியது.
இந்நிலையில், இளவரசர் ஹாரி தனது சொந்த நாடான பிரிட்டனையும், சொந்த உறவுகளையும் பிரிந்து தனிமைப்படுத்தப் பட்டு விட்டதாக உணரத் தொடங்கி இருப்பதாகவும், அவரது மனைவி மேகன் மார்க்கெலை ஹாரியின் நண்பர்கள் விரும்பாததால், அவர்களும் ஹாரியிடம் இருந்து ஒதுங்கி இருப்பதாகவும் கூறப்படுகிறது.
இளவரசர் ஹாரியை காண அவரது நண்பர்கள் வருகை தராத காரணத்தால் தனிமைப்படுத்தப்பட்டதாக உணர்கிறார் என்று அரச குடும்பத்திற்கு நெருக்கமான டாம் க்வின் தெரிவித்திருக்கிறார். மேலும் இளவரசர் ஹாரி , அமெரிக்காவில் தனது வாழ்க்கை குறித்த நிச்சயமற்ற தன்மையை வெளிப்படுத்துவதாக வருத்தப்படுவதாகவும் செய்திகள் தெரிவிக்கின்றன.
இளவரசர் ஹாரி மிகவும் மகிழ்ச்சியற்றவராகத் இருப்பதாகவும் , ஹாரி தனது மனைவியால் ஓரங்கட்டப்படுவதாகவும், மோசமாக நடத்தப்படுவதாகவும் ராயல் வாழ்க்கை வரலாற்றாசிரியர் ஏஞ்சலா லெவின் குறிப்பிட்டிருக்கிறார்.
பிரிட்டனில் வசிக்க இடமில்லாமல் போனதால், ஹாரி இங்கிலாந்தில் புதிய இடத்தைத் தேடுவதாகவும் கூறப்படுகிறது. இதற்காக ஹாரி தனது சொந்த நாட்டில் உள்ள சொத்துக்களை பரிசீலித்து வருவதாக இங்கிலாந்து மன்னர் சார்லஸின் முன்னாள் சமையல்காரர், கிராண்ட் ஹரோல்ட் கூறியிருக்கிறார்.
இந்த நடவடிக்கை ஹாரி தனது தந்தையுடனான உறவை சரிசெய்து, அரச குடும்பத்தில் மீண்டும் சேரலாம் என்ற நம்பிக்கையில், இங்கிலாந்தில் அதிக நேரம் செலவிடுவதற்கான திட்டத்தின் ஒரு பகுதியாகத் தெரிய வருகிறது.
இளவரசர் ஹாரி, அரச குடும்பத்தில் உருவாக்கிய காயங்களைக் குணப்படுத்த அவருக்கு இன்னும் சிறிது காலம் ஆகலாம் என்று அரச குடும்பத்தை நன்கு அறிந்தவர்கள் தெரிவிக்கிறார்கள்.
