முதலில் குடிபோதையில் பிரச்சனை செய்யும் கட்சிக்காரர்களை திருமாவளவன் கட்டுப்படுத்தட்டும் – பாஜக மாநில செயலாளர் அஸ்வத்தாமன் விமர்சனம்!

பொதுமக்களிடம் குடிபோதையில் பிரச்சனை செய்யும் விடுதலை சிறுத்தைகள் கட்சியினரை கட்டுப்படுத்த முடியாமல் திருமாவளவன் மாநாடு நடத்துவது ஊருக்கு உபதேசம் செய்வதுபோல் உள்ளது என பாஜக மாநில செயலாளர் அஸ்வத்தாமன் விமர்சித்துள்ளார்.

மயிலாடுதுறை மாவட்டத்தில் பாஜக உறுப்பினர் சேர்க்கை ஆய்வு கூட்டம் மயிலாடுதுறையில் உள்ள பாஜக கட்சி அலுவலகத்தில் நடைபெற்றது. இதில் பாஜக மாநில செயலாளர் அஸ்வத்தாமன் கலந்து கொண்டு கட்சி நிர்வாகிகளுடன் உறுப்பினர் சேர்க்கை குறித்தும் ஆய்வு நடத்தினார்.

பின்னர் செய்தியாளர்களிடம் அவர் கூறியதாவது : தமிழகத்தில் பாஜ உறுப்பினர் சேர்க்கை பேரியக்கம் முழுவீச்சில் நடந்துகொண்டிருக்கிறது. மயிலாடுதுறை மாவட்டத்தில் எந்த அளவிற்கு வீரியமாக நடந்துகொண்டிருக்கிறது என்பதை ஆய்வு செய்வதற்காக வந்திருக்கிறேன்.

கடந்த 23ம் தேதி காரைக்கால் மாவட்ட பாஜக விவசாய அணி மாவட்ட செயலாளர் விஜயகுமார் குடும்பத்தோடு ஆந்திராவிற்கு குழந்தையின் சிகிச்சைக்காக சென்றுவிட்டு கடலூர் மாவட்டம் புவனகிரி வழியாக காரைக்கால் நோக்கி சென்றபோது விடுதலை சிறுத்தைகள் கட்சி அப்பகுதி ஒன்றிய செயலாளர் முல்லைமாறன் தலைமையில் குண்டர்கள் உச்சப்பச்ச குடிபோதையில் விஜயகுமார் மற்றும் அவரது குடும்பத்தினரை தாக்கி தரகுறைவாக பேசி பாஜக கொடியை கிழித்து பிரச்சனை செய்துள்ளனர்.

25ம் தேதி மாவட்ட எஸ்.பி.யிடம் புகார் அளித்தும் இதுவரை வழக்கு பதிவு செய்யப்படவில்லை. மோசமான செயலை செய்த சிசிடிவி காட்சியை கொடுத்த வணிகரை போலீசார் மிரட்டுகின்றனர். சமூக விரோத செயல்களை செய்கின்றவர்களுக்கு தமிழக காவல்துறை ஆதரவாக இருக்கிறதா என்ற சந்தேகம் எழுகிறது.

குடும்பத்தோடு செல்பவரை பிரச்சனை செய்ய வேண்டுமென்று திருமாவளவன் பயிற்சி கொடுத்து இருக்கிறாரா?. விடுதலை சிறுத்தைகள் கட்சியினரிடம் மதுஒழிப்பை முதலில் நடைமுறைப்படுத்தி, முல்லைமாறனை கட்சி பதவியில் இருந்து நீக்கிவிட்டு உங்கள் மதுஒழிப்பு மாநாட்டை நடத்துங்கள்.

விடுதலைசிறுத்தைகள் கட்சியினர் குடிபோதையில் பொதுமக்களிடம் பிரச்னை செய்கின்றனர். அதனைகட்டுப்படுத்தமுடியாமல் மதுஒழிப்பு மாநாடு நடத்துவது ஊருக்கு உபதேசம் செய்வதுபோல் உள்ளது.

காவல்துறையினர் இது குறித்து உரிய நடவடிக்கை எடுக்கவில்லை என்றால் பாஜக சார்பில் காவல்துறை கண்டித்து போராட்டம் நடத்துவோம்.

கருணாநிதி காலத்தில் ஸ்டாலினை கொண்டுவந்தார்கள். அவர் கட்சியில் பல பதவிகள் வகித்து கருணாநிதியுடன் அரசியல் பயணத்தில் இருந்துள்ளார். உதயநிதி ஒரு நடிகர். திரைத்துறையில் பெரிய சாதனை படைத்தவர்கள் என்று சொல்ல முடியாது. வாரிசு அரசியல் திமுகவில் இருக்கும். அதனை திமுகவினர் ஒத்துகொள்கின்றனர். . எந்த நாற்காலியில் யார் இருந்தால் என்ன. வாரிசு அரசியல் மக்களாட்சி தத்துவதற்கு எதிரானது என அவர் தெரிவித்தார்.