சென்னை 2-ஆம் கட்ட மெட்ரோ திட்டத்துக்கு மத்திய அரசு 65 சதவீத நிதியளிப்பதாக தெரிவித்துள்ளது.
சென்னை மாதவரம் முதல் சிப்காட் வரையும், கலங்கரை விளக்கம் முதல் பூந்தமல்லி வரையும், மாதவரம் முதல் சோழிங்கநல்லூர் வரையும் 2-ஆம் கட்ட மெட்ரோ திட்டம் செயல்படுத்தப்படுகிறது.
இதையொட்டி, 63 ஆயிரத்து 246 கோடி ரூபாயை விடுவிக்க மத்திய அமைச்சரவை அண்மையில் ஒப்புதல் அளித்திருந்தது.
இதில் 65 சதவீத நிதி மத்திய அரசின் தொகுப்பிலிருந்து விடுவிக்கப்படும் என நிதியமைச்சகம் விளக்கமளித்துள்ளது.
இதில், ரூ.33,593 கோடி முழுக் கடனும், சமபங்கு மற்றும் சார்நிலைக் கடனாக ரூ.7,425 கோடியும் அடங்கும் என்றும் மத்திய அரசு தெரிவித்துள்ளது.
எஞ்சிய 35 சதவீத நிதியை மாநில அரசு மேற்கொள்ளும் என்றும், பன்னாட்டு முகமையிடம் இருந்து பெறப்படும் கடன்கள் மத்திய அரசின் கடனாகவே கருதப்படும் என்றும் நிதியமைச்சகம் விளக்கமளித்துள்ளது.
