சென்னை அமைந்தகரையில் சிறுமி கொல்லப்பட்ட வழக்கில் வீட்டின் உரிமையாளர் உள்ளிட்ட 6 பேரை போலீசார் கைது செய்தனர்.
தஞ்சையை சேர்ந்த 16 வயது சிறுமி ஒருவர் அமைந்தகரையில் உள்ள அடுக்குமாடி குடியிருப்பில் வேலை செய்து வந்தார். அவர் கடந்த சில நாட்களுக்கு முன்பு வீட்டிலுள்ள குளியலறைக்கு சென்று நீண்ட நேரமாகியும் வெளிவரவில்லை எனக் கூறப்படுகிறது.
இதனைக் கண்ட வீட்டின் உரிமையாளர் ஹர்ஷத் என்பவர் குளியலறைக்குள் சென்று பார்த்தபோது சிறுமி உயிரிழந்த நிலையில் சடலமாக கிடந்ததாக கூறப்படுகிறது. இதுகுறித்து யாரிடமும் தகவல் தெரிவிக்காத அவர், ஒரு நாள் கழித்து காவல்துறைக்கு தகவலளித்தார்.
அதன் பேரில் சம்பவ இடத்திற்கு சென்ற போலீசார், சிறுமியின் உடலை கைப்பற்றி உடற்கூராய்வுக்காக அனுப்பி வைத்தனர். அப்போது சிறுமியின் உடலில் சிகரெட்டால் சுட்ட காயங்கள் மற்றும் சிறுமியின் உடலில் ஆங்காங்கே தாக்கப்பட்ட காயங்களும் இருந்தது கண்டுபிடிக்கப்பட்டது.
எனவே இந்த சம்பவத்தை மர்ம மரணம் என வழக்குப்பதிவு செய்த போலீசார், ஹர்சத் உள்ளிட்ட 6 பேர் மீது கைது செய்து விசாரணை நடத்தி வருகின்றனர்.
