ஜார்க்கண்ட்டில் பாஜக ஆட்சியமைத்தால் மாநிலத்தின் வளர்ச்சி இரட்டிப்பு வேகத்தில் நகரும் என பிரதமர் மோடி உறுதியளித்துள்ளார்.
ஜார்க்கண்ட் மாநிலத்திற்கு வரும் 13 மற்றும் 20-ம் தேதிகளில் இரண்டு கட்டங்களாக சட்டப்பேரவைத் தேர்தல் நடைபெறவுள்ளது. இந்நிலையில், பிரதமர் மோடி தீவிர பிரச்சாரம் மேற்கொண்டு வருகிறார். கார்வாவில் நடைபெற்ற பொதுக்கூட்டத்தில் கலந்துகொண்டு உரையாற்றினார்.
அப்போது சில மாதங்களுக்கு முன்பு தொடர்ந்து மூன்றாவது முறையாக மத்தியில் பாஜக-என்டிஏ ஆட்சியை அமைக்க ஒத்துழைப்பு அளித்தீர்கள். தற்போது ஜார்கண்டில் சட்டமன்றத் தேர்தல்கள் நடைபெறுகிறது. எனவே அனைவரும் ஒன்றுபட்டு, பாஜக-என்டிஏ தலைமையில் இரட்டை இயந்திர ஆட்சியை அமைக்க வேண்டும் என கேட்டுக்கொண்டார்.
மக்களவை தேர்தலின்போது நாடு முழுவதும் 3 கோடி வீடுகளை கட்டித் தருவதாக வாக்குறுதியளித்தேன், தற்போது ஜார்க்கண்ட்டிலும் 21 லட்சம் புதிய வீடுகளை அமைக்க திட்டமிட்டிருப்பதாகவும் தெரிவித்தார்.
ஏழை மக்களுக்கும் வீடு இருக்க வேண்டும் என்பதே பாஜகவின் லட்சியம் எனவும் அவர் கூறினார். மேலும், ஜார்க்கண்ட்டில் பாஜக ஆட்சியமைத்தால் 3 லட்சம் அரசுப் பணியிடங்கள் நிரப்பப்படும் எனவும் பிரதமர் உறுதியளித்தார்.
