தமிழ்நாடு அரசின் டெல்லி சிறப்பு பிரதிநிதியாக ஜனநாயகன் பட தயாரிப்பாளர் வெங்கட நாராயணா நியமிக்கப்பட்டுள்ள நிலையில், அப்பதவியை வகிப்பவருக்கு வழங்கப்படும் முக்கிய சலுகைகள் மற்றும் அதிகாரங்கள் குறித்து இப்போது பார்க்கலாம்…
டெல்லியில் தமிழ்நாடு அரசின் சிறப்பு பிரதிநிதியாக நியமிக்கப்படுபவர் அமைச்சர் பதவிக்கு இணையான தகுதி பெறுகிறார்.
மாநில அரசுகளின் கோரிக்கைகளை மத்திய அரசிடம் முன்னிலைப்படுத்துவது இவரது முக்கியப் பணியாகும். மாதந்தோறும் தொகுப்பு ஊதியமாக 10 ஆயிரம் ரூபாய் வழங்கப்படும் . டெல்லியில் அரசு சொகுசு பங்களா வசதி அளிக்கப்படும்.
தங்குமிடத்தில் இலவச உணவுகள் மற்றும் இதர அடிப்படை வசதிகள் செய்து தரப்படும்
தினசரி பணிகளைக் கவனிக்கத் தனி உதவியாளர்கள் மற்றும் பணியாளர்கள் நியமிக்கப்படுவார்கள்.
டெல்லி மற்றும் சென்னை தலைமைச் செயலகத்திலும், உதவியாளர் வசதியுடன் கூடிய தனி அறை மற்றும் தொலைபேசி உள்ளிட்ட நிர்வாகச் செலவுகள் அடங்கும். கேபினட் அமைச்சர் அந்தஸ்துடன் டெல்லியிலும், தமிழகத்திலும் அரசுப் பணிகளை மேற்கொள்வதற்காக பிரத்யேக வாகன வசதி அளிக்கப்படும்.
மத்திய அமைச்சர்கள் மற்றும் அரசு அதிகாரிகளைச் சந்திப்பதற்கான பிரத்யேக அனுமதிகள் செய்து தரப்படும். மாதம் இருமுறை, டெல்லிக்கும் சென்னைக்கும் இடையில் இலவச விமானப் பயணம் மேற்கொள்ளலாம் என்பது குறிப்பிடத்தக்கது.
