மருத்துவக் காப்பீட்டுத் தொகை ஆண்டுக்கு 5 லட்சம் ரூபாயில் இருந்து 25 லட்சம் ரூபாயாக உயர்த்தப்படும் என முதலமைச்சர் ஜோசப் விஜய் அறிவித்துள்ளார்.
சட்டப்பேரவையில் 110 விதியின் கீழ் மருத்துவத்துறை சார்பில் அறிவிப்புகளை வெளியிட்ட முதலமைச்சர் ஜோசப் விஜய், வடசென்னை மக்களின் மருத்துவ வசதிக்காக 300 கோடி ரூபாய் மதிப்பில் பெரம்பூரில் உலகத்தரத்திலான பன்னோக்கு உயர் சிறப்பு மருத்துவமனை அமைக்கப்படும் என தெரிவித்தார்.
முதலமைச்சரின் விரிவான மருத்துவக் காப்பீட்டுத் திட்டத்தின் கீழ் வழங்கப்படும் தொகை ஆண்டுக்கு 5 லட்சம் ரூபாயில் இருந்து 25 லட்சம் ரூபாயாக உயர்த்தப்படும் என்றும்,
திருநங்கைகளுக்கான மருத்துவச் சிகிச்சை சேவைகள் கூடுதலாக சென்னை ஸ்டான்லி, நெல்லை, தூத்துக்குடி, செங்கல்பட்டு, திருவாரூர், தருமபுரி, கன்னியாகுமரி ஆகிய 7 மருத்துவமனைகளில் முதலமைச்சரின் விரிவான மருத்துவக் காப்பீட்டுத் திட்டத்தின் கீழ் வழங்கப்படும் எனவும் குறிப்பிட்டார்.
அரசு மருத்துவக் கல்லூரிகளில் 351 கோடி ரூபாய் மதிப்பீட்டில் கூடுதல் மாணவர் சேர்க்கை இடங்கள் உருவாக்கப்படும் என்றும்,
தரமான மருத்துவ சேவைக்குத் தேவையான செவிலியர், மருத்துவம் மற்றும் துணை மருத்துவப் பணியாளர்களை உருவாக்கும் வகையில் 6 ஆயிரத்து 98 கூடுதல் மாணவர் சேர்க்கை இடங்கள் உருவாக்கப்படும் எனவும் தெரிவித்தார்.
தமிழகத்தில் 7 புதிய அரசு செவிலியர் கல்லூரிகள் தொடங்கப்படும் எனவும் குறிப்பிட்டார்.
தமிழகத்தில் அதிகரித்து வரும் புற்றுநோயைத் தடுக்க 673 கோடியே 44 லட்சம் ரூபாய் மதிப்பில் முதலமைச்சரின் புற்றுநோய் தடுப்பு மற்றும் பராமரிப்பு இயக்கம் மேம்படுத்தப்படும் எனவும் கூறினார்.
சென்னை ராஜீவ் காந்தி அரசு பொது மருத்துவமனையில் 471 கோடியே 80 லட்சம் ரூபாய் மதிப்பீட்டில் ஒருங்கிணைந்த புற்றுநோய் சிகிச்சைப் பிரிவு அமைக்கப்படும் என்றும்,
முதற்கட்டமாக மதுரை ராஜாஜி மருத்துவமனையில் 84 கோடி ரூபாய் மதிப்பில் மண்டல புற்றுநோய் மையம் தொடங்கப்படும் எனவும் தெரிவித்தார்.
தருமபுரி, விழுப்புரம், திருவண்ணாமலை, பெரம்பலூர், அரியலூர் ஆகிய மாவட்டங்களில் 8 கோடியே 70 லட்சம் ரூபாய் மதிப்பீட்டில் ஒரு லட்சத்து 22 ஆயிரம் பெண்களுக்கு HPV DNA பரிசோதனை மேற்கொள்ளப்படும் எனவும்,
மேலும், 2 கோடியே 77 லட்சம் ரூபாய் செலவில் மருத்துவர்களுக்கு பயிற்சியும், நோயாளிகளுக்கு ஊட்டச்சத்து ஆதரவும் அளிக்கப்படும் என்றும் முதலமைச்சர் ஜோசப் விஜய் தெரிவித்தார்.
