மானத்தைப் பற்றி கவலையில்லாத ஒருவரிடம் தமிழ்நாடு சிக்கியுள்ளதாக முதலமைச்சர் விஜய் மீது சென்னை மேயர் பிரியா கடும் விமர்சனங்களை முன்வைத்துள்ளார்.
சென்னை மாநகராட்சியின் மாமன்ற கூட்டம் மேயர் பிரியா தலைமையில் ரிப்பன் மாளிகையில் நடைபெற்றது. இதில் பாஜக உள்ளிட்ட அனைத்து கட்சிகளை சேர்ந்த மாமன்ற உறுப்பினர்கள் பங்கேற்றனர். அப்போது மேயர் பிரியா தனது உரையை வாசிக்க தொடங்கிய போது ஸ்டாலின் குறித்து விமர்சித்து வரும் முதலமைச்சர் விஜய்யை கடுமையாக சாடினார். அதில் மானத்தைப் பற்றி கவலையில்லாத ஒருவரிடம் தமிழ்நாடு சிக்கியுள்ளதாக தெரிவித்திருந்தார். அவரது இந்தக் கருத்து தவெகவினர் மத்தியில் அதிர்ச்சியை ஏற்படுத்தி உள்ளது
இதனைத் தொடர்ந்து மாமன்ற கூட்டத்தில் அம்பேத்கரின் புகைப்படம் அகற்றப்பட்டு இருந்ததால் விசிகவினர் எதிர்ப்பு தெரிவித்தனர். இது குறித்து மேயரிடம் வாக்குவாதத்தில் ஈடுபட்ட விசிக உறுப்பினர்கள் அவையில் இருந்து வெளிநடப்பு செய்தனர். இதனால் அங்கு சிறிது நேரம் அசாதாரண சூழல் நிலவியது.
இதனையடுத்து தீர்மானத்தை வெளியிட்ட மேயர் பிரியா வளர்ப்பு பிராணிகளை கைவிடும் உரிமையாளர்களுக்கு அபராதம் விதிக்கப்படும் என தெரிவித்தார். அதில் சென்னைக்கு உட்பட்ட பொது இடங்களில் நாய், பூனை போன்ற வளர்ப்பு பிராணிகளை அதன் உரிமையாளர்கள் கைவிட்டு சென்றால் நடவடிக்கை எடுப்பதோடு பத்தாயிரம் ரூபாய் அபராதம் விதிக்கப்படும் என தீர்மானம் நிறைவேற்றப்பட்டது.
