ஓட்டப்பிடாரம் அருகே விவசாய நிலங்கள் வழியாக உயர் மின்னழுத்த மின்பாதை அமைப்பதற்கு எதிர்ப்பு தெரிவித்து, 8 விவசாயிகள் மின் கோபுரத்தில் ஏறி போராட்டத்தில் ஈடுபட்டனர்.
தூத்துக்குடி மாவட்டம், ஒட்டப்பிடாரம் அருகே எப்போதும் வென்றான் – பசுவந்தனை சாலை பகுதியில், தனியார் நிறுவனத்தின் சோலார் மின் உற்பத்திக்காக உயர் மின்னழுத்த மின்கோபுரங்கள் அமைக்கும் பணிகள் நடைபெற்று வருகின்றன.
விளைநிலங்கள் வழியாக மின்பாதை அமைக்கப்படுவதால், மழைக்காலங்களில் மின்கசிவு ஏற்பட்டு உயிருக்கு ஆபத்து ஏற்படும் என விவசாயிகள் குற்றம்சாட்டினர். இதுதொடர்பாக பலமுறை மாவட்ட ஆட்சியரிடம் மனு அளித்தும் நடவடிக்கை எடுக்கப்படவில்லை எனக் கூறி, 8 விவசாயிகள் மின் கோபுரத்தில் ஏறி போராட்டத்தில் ஈடுபட்டனர்.
விவசாய நிலங்களுக்கு பாதிப்பு ஏற்படாத வகையில் மாற்று வழித்தடத்தில் மின்பாதை அமைக்க வேண்டும் என அவர்கள் கோரிக்கை விடுத்ததுடன், கோரிக்கை நிறைவேறாவிட்டால் தொடர் போராட்டத்தில் ஈடுபடப்போவதாகவும் எச்சரித்தனர்.
