உள்நாட்டிலேயே தயாரிக்கப்பட்ட முதல் கடற்படை ஆதரவு கப்பலான சூர்யாவை மத்திய பாதுகாப்புத்துறை அமைச்சர் ராஜ்நாத் சிங் நாட்டுக்கு அர்ப்பணித்தார்.
ஆந்திர மாநிலம் விசாகப்பட்டினத்தில் உள்ள ஹிந்துஸ்தான் கப்பல் கட்டுமான நிறுவனத்தால், 19 ஆயிரம் கோடி ரூபாய் மதிப்பீட்டில் 5 கடற்படை ஆதரவு கப்பல்கள் கட்ட திட்டமிடப்பட்டுள்ளது. இதன் முதல் கப்பலான ‘சூர்யா’ கடற்படையில் முறைப்படி இணைக்கப்பட்ட நிலையில், 5-வது கப்பலுக்கான அடித்தள கட்டமைப்பு பணியையும் ராஜ்நாத் சிங் தொடங்கி வைத்தார்.
நிகழ்ச்சியில் ஆந்திர முதலமைச்சர் சந்திரபாபு நாயுடு, கடற்படை தளபதி அட்மிரல் கிருஷ்ணா சுவாமிநாதன் உள்ளிட்டோர் பங்கேற்றனர். நடுக்கடலில் போர்க்கப்பல்களுக்கு எரிபொருள், குடிநீர், ஆயுதங்களை வழங்கும் திறன் கொண்ட சூர்யாவில், 20 ஆயிரம் டன் டீசல், 2 ஆயிரத்து 500 டன் விமான எரிபொருள், ஆயிரம் டன் குடிநீரை கையாள முடியும் என தெரிவிக்கப்பட்டுள்ளது.
