வரும் 2047க்குள் வளர்ந்த இந்தியா உலகளாவிய உற்பத்தி மையமாக மாறுவது, ஒலிம்பிக் போட்டிகளை நடத்துவது, விண்வெளித் துறையில் புதிய உச்சங்களை தொடுவது போன்ற லட்சியங்களை நோக்கி நாடு வேகமாக முன்னேறி வருகிறது. இந்த உத்வேகம் நம்ப முடியாத வகையில், வியக்கும் அளவுக்கு இருக்கிறது. இதற்குப் பின்னால் இருக்கும் ஒரே தலைமை பிரதமர் மோடி என்று சர்வதேசமே பாராட்டுகிறது. அது பற்றிய ஒரு செய்தி தொகுப்பு.
2001ஆம் ஆண்டு அக்டோபர் 7ம் தேதி குஜராத் முதல்வராக பதவியேற்றார் நரேந்திர மோடி. அன்றிலிருந்து தொடர்ந்து 2014 வரை அம்மாநில முதல்வராக இருந்த போது நடந்த மக்களவைத் தேர்தலில் போட்டியிட்டு, நாட்டின் பிரதமராக முதன்முறையாக பதவியேற்றார்.
மக்களின் ஏகோபித்த ஆதரவுடன் வெற்றி பெற்று தொடர்ந்து மூன்றாவது முறையாக பிரதமர் பதவியில் 12 ஆண்டுகளைப் பிரதமர் மோடி நிறைவு செய்துள்ளார்.
குஜராத் மாநில முதல்வராக, 13 ஆண்டுகள், நாட்டின் பிரதமராக, 12 ஆண்டுகள் என, அரசு தலைமை பொறுப்பில், தொடர்ச்சியாக, 25 ஆண்டுகளைப் பிரதமர் மோடி நிறைவு செய்துள்ளார்.
குஜராத்தின் முதலமைச்சராக இருந்தபோது, ஜப்பான், சீனா, சிங்கப்பூர் மற்றும் தென் கொரியா போன்ற முக்கிய ஆசியப் பொருளாதாரங்களுடன் பொருளாதார மற்றும் இராஜதந்திர உறவுகளை வளர்த்து, குஜராத்தை வெளிநாட்டு நேரடி முதலீட்டிற்கான ஒரு மையமாக பிரதமர் மோடி அப்போதே மாற்றியுள்ளார். 2009-ல் ஜப்பான் குஜராத்தின் முதல் அதிகாரப்பூர்வ கூட்டணி நாடாக மாறியது.
2014-ல் நாட்டின் பிரதமராகப் பொறுப்பேற்றதும் நாடுகளுக்கு இடையேயான நேரடி வர்த்தக உறவுகள் மற்றும் புலம்பெயர்ந்தோருடனான ஈடுபாடு ஆகியவற்றை இணைக்கும் ஒருங்கிணைந்த அணுகுமுறையே, நாட்டின் வெளியுறவுக் கொள்கையின் மறுகட்டமைப்பின் அடித்தளமாக அமைந்தது.
‘அண்டை நாடுகளுக்கு முன்னுரிமை’ மற்றும் ‘கிழக்கு நோக்கிய செயல்பாடு’ ஆகிய கோட்பாடுகளின் கீழ், இலங்கையின் ‘கடைசிப் புகலிடக் கடன் வழங்குநராக’ இந்தியா எரிபொருள், உணவு, கடன் வசதிகள் மற்றும் நாணயப் பரிமாற்றங்களுக்காக 4 பில்லியன் டாலருக்கும் அதிகமான தொகையை வழங்கியது
சாகர் என்ற திட்டத்தின் மூலம் இந்தியப் பெருங்கடல் கடலோரப் பகுதிக்கு ஒரு கடல்சார் கோட்பாட்டை வழங்கியதுடன், மொரிஷியஸ், செஷல்ஸ், மாலத்தீவுகள் மற்றும் இலங்கையுடனான பாதுகாப்பு கூட்டாண்மைகளை ஆழப்படுத்தியது.
கூடுதலாக ‘ஆக்ட் ஈஸ்ட்’ திட்டத்தின் மூலம் இந்தியாவை இந்தோ-பசிபிக் முழுவதும் ஒரு தவிர்க்க முடியாத பாதுகாப்பு வழங்கும் கடல் வல்லரசாக நிலைநிறுத்தியது
2017-ல் இஸ்ரேலுக்கு அதிகாரப்பூர்வ பயணம் மேற்கொண்ட முதல் இந்தியப் பிரதமர் என்ற பெருமையைப்பெற்ற பிரதமர் மோடி, இஸ்ரேலுடன் உறவைப் பேணும் நிலையிலும் வளைகுடா நாடுகளுடனான கூட்டாண்மையையும் புதிய உச்சத்துக்குக் கொண்டு சென்றார்.
இஸ்ரேல், ஐக்கிய அரபு அமீரகம் மற்றும் அமெரிக்காவுடன் இணைந்து, I2U2 கட்டமைப்பிலும் இந்தியா-மத்திய கிழக்கு-ஐரோப்பா பொருளாதார வழித்தடத் திட்டத்திலும் இணைந்ததன் மூலம் ஒரு புதிய மைல்கல்லை இந்தியா எட்டியது.
சீனாவுடன் தற்காப்புடன் கூடிய கட்டுப்படுத்தப்பட்ட போட்டி மனப்பான்மையைக் கடைப்பிடித்து வரும் இந்தியா இருநாடுகளுக்கும் இடையேயான தொழில்நுட்ப வளர்ச்சி இடைவெளிகளைக் குறைக்கவும், உற்பத்தியை அதிகரிக்கவும் உள்நாட்டுச் சூழல் அமைப்புகளை உருவாக்கவும் நடவடிக்கை எடுத்து வருகிறது.
அமெரிக்காவின் வரிவிதிப்பு அழுத்தங்களுக்கு இடையே ஐரோப்பிய யூனியன், இங்கிலாந்து, நியூசிலாந்து, கனடா, ஓமன் உள்ளிட்ட பல்வேறு நாடுகளுடன் தடையற்ற வர்த்தக ஒப்பந்தத்தை இந்தியா வெற்றிகரமாக எட்டியுள்ளது.
ஈரான் போர் தொடரும் நிலையில் தனது எரிசக்தி மற்றும் கனிம இறக்குமதி நெட்வொர்க்கை 27 நாடுகளில் இருந்து 41 நாடுகளாக விரிவுபடுத்தியது
யுபிஐ, ஆதார் மற்றும் இறையாண்மை தரவு அமைப்புகள் உள்ளிட்டவற்றைத் திறந்த மூல டிஜிட்டல் பொது உள்கட்டமைப்பாக ஒருங்கிணைப்பதன் மூலம், ஏகபோக மேற்கத்திய தொழில்நுட்பம் மற்றும் சீனாவின் வற்புறுத்தும் தந்திரங்களுக்கு மாற்றாக, இந்தியா வளரும் பொருளாதாரங்களுக்கு ஒரு மாற்று வழியை வழங்கியுள்ளது.
குறிப்பாக தடுப்பூசி மைத்ரி முன்முயற்சியின் மூலம், உலகளாவிய தடுப்பூசி தேசியவாதத்தால் ஓரங்கட்டப்பட்ட சுமார் 100 வளரும் நாடுகளுக்கு, கோவிட் பெருந்தொற்றின் போது இந்தியா 30 கோடிக்கும் அதிகமான தடுப்பூசிகளை வழங்கியது.
மேலும் ஜி 20 அமைப்பில் ஆப்பிரிக்காவை இணைத்தது மற்றும் உலகத் தெற்கின் வளரும் நாடுகளின் குரலாக சர்வதேச அரங்கில் இந்தியா இருக்கிறது.
சுருக்கமாக சொல்லப்போனால் உலகளாவிய ஒழுங்கைப் பின்பற்றும் நிலையில் இருந்து, உலகளாவிய தீர்வுகளை வழங்கும் நாடாக இந்தியாவை மாற்றியதே பிரதமர் மோடியின் மிகப் பெரிய சாதனையாகும்.
