திருப்பூரில் செல்போன் வாங்கித் தருவதாகக் கூறி பண மோசடி செய்த கல்லூரி மாணவரைக் கொலை செய்த 12-ம் வகுப்பு மாணவன் நீதிமன்றத்தில் சரணடைந்தார்.
திருப்பூர் இந்திரா நகரைச் சேர்ந்த ஸ்ரீஹரி, கொடுவாய் அருகே கல்லூரியில் பயின்று வந்தார். இவரும் அதே பகுதியைச் சேர்ந்த 12-ம் வகுப்பு மாணவரும் நண்பர்களாக பழகி வந்துள்ளனர். இந்நிலையில், ஆப்பிள் செல்போன் வாங்கித் தருவதாகக் கூறி 8 ஆயிரம் ரூபாய் பெற்ற ஸ்ரீஹரி, திருட்டு செல்போனை வழங்கிவிட்டு மீண்டும் அதனைத் திரும்பப் பெற்றதாகக் கூறப்படுகிறது.
இதனால் ஆத்திரமடைந்த பள்ளி மாணவன், ஸ்ரீஹரியைத் தனியாக அழைத்துச் சென்று கறி வெட்டப் பயன்படுத்தும் கத்தியால் அவரை சரமாரியாக வெட்டியுள்ளார். பின்னர் அங்கிருந்து தப்பியோடிய பள்ளி மாணவர், பின்னர் திருப்பூர் நீதிமன்றத்தில் சரணடைந்தார்.
இதற்கிடையே படுகாயங்களுடன் மீட்கப்பட்ட ஸ்ரீஹரி, மருத்துவமனையில் சிகிச்சை பலனின்றி உயிரிழந்தார். இந்நிலையில், இந்த சம்பவம் தொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.
